ATOL sa umaabot nga National Simultaneous Earthquake Drill (NSED) Huwebes, Nobiyembre 14, 2019 sa Central Visayas, gihimo ang Dakbayan sa Talisay nga sentro diin buot tutokan sa uluhang buhatan sa Office of the Civil Defense aron makita kon unsa kaandam ang mga tunghaan ugaling moigo ang dagkong linog.
Giangkon ni Alvin Santilla, pangulo sa Talisay City Disaster Risk Reduction and Management Office, bisan pa man kon kaupat o quarterly sila nga mopahigayon og earthquake ug fire drill, usa gihapon nga hagit ang wala'y makalas kon ugaling moigo ang sunod-sunod nga linog.
Usa pud sa ilang hagit mao ang pagpakalma sa kabatan-onan sa nagkadaiyang tunghaan sa oras sa delubyo.
Gibutyag ni Santilla nga bisan pa man sa ilang paningkamot nga mapaubos sa training ug seminar ang katawhan, dili gihapon kapugngan nga aduna'y mga tawo nga malisang sa panghitabo ug madisgrasya.
"Ang challenge man gyud nato nga sa bisan pirmi nato gihimo nga mga drill, kini gyud nga dili mag-panic ang mga bata or bisan mga dagko. Diha sa mga drill, dapat gyud nato ipabutang sa ilang panghuna-huna nga kinahanglan they should have presence of mind," pasabot ni Santillana.
Sa umaabot nga katapusang NSED sa 2019, mga tunghaan lang sa Dakbayan sa Talisay ang pasalmuton, diin kasagaran niini mga pampubliko nga tunghaan sa elementarya ug high school.
Giklaro ni Santillana nga sa matag linain nga mga drill sa dakbayan, mosalmot ang kapin sa 40 ka public and private schools.
Anaa usab gihimo nga mga earthquake drill ang mga establisemento sama sa mga mall ug bangko.
Sa laing bahin, ang konseho sa Dakbayan sa Talisay nipalabang na sa resolusyon, Martes sa buntag, Nobiyembre 5, alang sa paghatag og P1 milyon nga hinabang alang sa mga biktima sa linog sa Davao ug Soccsksargen regions.
