NAILHAN na ang suspetsado nga nipatay sa usa ka binilanggo sa Mandaue City Jail Lunes alas 10 pasado sa buntag, Hulyo 29, 2019.
Giila ang suspek nga si Jade Saladaga, kinsa aduna'y kasong murder.
Giangkon matud pa sa suspek nga iyang gipalusot ang armas sa luyo nga bahin sa bilanggoan tungod kay nagplano na siya nga patyon si Ramas.
Siya matud pa ang pasanginlan ni Ramas nga informant sa police ug kanunay siya nga kulatahon niini.
Sa report sa medico legal officer sa Mandaue City Police Office nga duha ka samad sa lawas ug usa sa ulo ang naangkon ni Ramas nga miresulta sa iyang kamatayon.
Si Ramas nabalhog niadtong Mayo 2017 sa kaso nga illegal drugs.
Gitug-an ni Mandaue City Police Office Director, Police Colonel Jonathan Abella, nga nilutaw ang ngan ni Ramas nga usa sa mga tawo ni Steve Go, giiilang drug lord.
Si Go gipusil patay ni Cresenciano Heyrana sulod usab sa Mandaue City Jail niadtong Hunyo 19, 2018.
Mga sakop ni Go ang gipangtumbok nga nagpaluyo sa mga pinatyanay karon sa Dakbayan sa Talisay. Giingon sa kapulisan nga nag-unay ang mga ginsakpan ni Go.
Ang tulo ka mga tawo nga gipamatay sa Dakbayan sa Talisay gipangtumbok nga mga sinaligan kaniadto ni Go. (ANV)
