GIBANA-bana nga moabot sa P70,000 ang danyos sa sunog Biyernes sa buntag, Septiyembre 27, sa Sitio Kalubihan, Lower Tabok, Dakbayan sa Mandaue.
Nasunog ang ancestral house sa pamilyang Ngoa, gipanag-iya ni Teodora Ngoa.
Nadawat sa kabomberohan ang alarma alas 9:47 sa buntag ug hingpit nga napawng alas 10:19 sa buntag.
Wa hinuoy naangin nga laing balay atol sa sunog.
Sa pasiunang kasayuran, gibutyag ni Chief Investigator SFO2 Edgar Vergara nga nabiyaan ang balay sa kasamtangang nagpuyo sa maong balay nga si Jason Ngoa nga giingong namahaw sa gawas.
Wala hinuoy naangol sa hitabo. Padayon pang gisusi sa kabomberohan ang hinungdan sa sunog.
Sa nahipos nga lista sa kabomberohan, moabot sa tulo ka mga sunog na ang natala sulod lang sa usa ka semana diin miabot sa P1.2 milyones ang gibiling danyos.
Ang labing dako mao ang pagkasunog sa usa ka bodega sayo ning semanaha.
