MALANGAY na usab ang kinatibuk-an nga paggamit sa taytayan sa Mananga, sa barangay Tabunok, syudad sa Talisay.
Human nga usa lang sa duha ka lane sa padayong' gitrabaho karon ang posibleng' maablihan karong Domingo, Agusto 4.
Gitug-an ni Mayor Gerald Anthony 'Samsam nga ang kontraktor ang nangayo og dugang duha ka semana, alang pa sa dugang trabahuon.
Kon kahinumdoman, gipahibalo ni Gullas sayo ning buwana, nga nipasalig ang kontraktor sa taytayan nga magamit na ang kinatibuk-an karong' Agusto 4.
Apan kagahapon, giangkon ni Gullas nga nasubo siya sa dihang nihangyo ang taga Department of Public Works and Highways (DPWH) og laing duha ka semana aron hingpit mahuman ang pikas nga lane.
"August 4 maabli na, maabli na one lane, kay humanon pa og two more weeks ang other lane and the railings. I really thought magamit na gyud (totally). Kini man gud, kita dire sa City, and DPWH is not answerable to us, mao nay problema gyud karon, they are answerable to national. Ang ato nalang we are trying to do our best nga mo-ask nga mopadali-dali ang ilang trabaho," pasabot ni Gullas.
Karong Dominggo, mahimo na nuon na nga maagian ang inner lane nga padulong sa amihanan nga bahin sa Sugbo.
Hinuon si Jonathan Tumulak, ang pangulo sa Talisay City sa trapko, ang nanawag kang Engr. Jun Dela Cruz, head sa maintenance sa DPWH 1st Engineering District, kalabot niini.
Matod ni Tumulak nga pakigkitaan ni Dela Cruz ang kontraktor, pag-awhag nga magdugang og mga tawo nga motrabaho aron mapaspasan ug masiguro gihapon ang kalig-on.
Usa sa gikabalak-an sa mayor ang posible nga paghuot sa trapiko karong Agusto 11 tungod sa pagpahigayon sa usa ka dakong sporting event sa Sugbo nga mao ang Ironman diin ang rota motadlas og tulo ka kilometro nga bahin sa South Coastal Road sa Talisay.
Matud ni Tumulak nga laing pasalig sa DPWH, nga sa dili pa ang Ironman event, magamit na ang kinatibuk-an nga taytayan sa Mananga.