NABALAKA si Kongresista Jonas Cortes, Cebu 6th District sa negatibo nga epekto sa business sector sa pagpasira sa Mandaue City government sa tulo ka mga establisemento sa dakbayan niadtong Miyerkules, Pebrero 27.
Kini naglakip sa Big Hotel ug Big Hotel Suites ingon man Linear Coffee Shop nga pulos nahimutang sa 1.4 ka ektarya nga prime government lot sa Mantawi Drive, Barangay Tipolo, Mandaue City.
Gikatahong way business permit ug ang gibarogan sa maong edipisyo nahimutang sa luna nga gipanag-iya sa siyudad nga way direktang kontrata kay toa sa laing kompaniya.
Si Cortes namahayag nga sukad sa pamunuoan sa iyang amahan, anhing Mayor Demetrio "Boy" Cortes, gisundan nila ni kanhi Mayor Alfredo "Pedong" Ouano ug Thadeo Ouano hangtod sa iyang termino, gikan sa 2007 – 2016, sila naningkamot nga mamahimong business friendly ang Mandaue.
"Now by doing so, ang pagpasira, ang pagkiha... ang mga negosyante mahadlok na mobubo og puhonan dire (Mandaue City)," matod pa sa kongresista.
Iyang giklaro nga way kahiwian o kalapasan ang pito ka mga konsehal nga gikiha og kasong graft ni Mayor Luigi Quisumbing ngadto sa Ombudsman.
Ang nahisgutang konsehal naglangkob nila ni Nenita Ceniza-Layese, Malcolm Sanchez, Cynthia Remedio, Carmelino "Jun" Del Mar Jr., Marie Immaline Cortes-Zafra, Dalie Mae Cabatingan ug Ernie Manatad.
Ang maong mga konsehal nga ka-alyado ni Cortes niaprobar sa deed of assignment tali sa Katumanan Hardware Incorporated ug Cenore Corp.
Naguol ang kongresista nga napagan ang Big Hotel ilabi na ang mga kawani niini ug mga konsehal sa pamolitika.
"Hinaot pa unta nga masulbad ni as soon as possible. Set back ni sa atong economic gains," dugang pa ni Cortes.
Gikiha
Kasong kalapasan sa Republic Act 3019, o graft and corrupt practices act, ug grave misconduct ang gipasaka ni Quisumbing niadtong Huwebes sa hapon, Pebrero 28 .
Ang pagpasaka og kaso gihim human gi-ratify sa grupo ang deed of assignment atol sa ilang session niadtong Myerkules sa hapon, Pebrero 27.
Ang gibasehan sa maong mga konsehal sa pag-ratify ang sulat gikan sa kadagkuan sa Cenore.
Ang deed of assignment tali sa KHI ug Cenore Corporation, una na nga gikwestyon sa administrasyon karon.
Nakita usab sa Commission on Audit (COA) nga irregular nga transaction kay wala sa record sa Sangguniang Panlungsod.
Kini tungod kay wa gihatag ang pagtugot sa Konseho atol sa pag-confirm ni Cortes sa deed of assignment niadtong' 2013.
Gitug-an ni Atty.Elaine Bathan, chief of staff ni Quisumbing, nga wa usab gipahibaw ang konseho nga adunay deed of assignment sa paggamit sa luna nga iya sa gobyerno.
Way natala nga record niini ang SP.
Gihulagway ni Bathan nga ang maong lakang sa majority sa konseho pagpakita sa way pagtahud sa mayor ug sa balaud.
Wa usab kini magrespeto sa findings ug mando sa COA nga irregular ang deed of assignment sa KHI ug Cenore.
Alang sa kampo ni Cortes, pinaagi sa iyang chief of staff, Atty. Jamaal Calipayan, kini pagpang-harass ug pagpanghilabot sa prerogative sa Konseho.
"It is a clear act of harassment and encroachment of legislative prerogative. A blatant transgression attempt to subdue a coequal body in government," sa text message nga gipadala ni Calipayan sa Supervoxpop Cebu.
Daan na usab namahayag si Manatad nga ang ilang pag-ratify gihimo subay ra sa gipadala nga opinion sa City legal office.
