SA LABING unang higayon, nipasaka og kaso ang Philippine Coast Guard District Central Visayas (PCGDCV) batok sa tag-iya sa piggery sa San Fernando, habagatang Sugbo, nga nasakpan nga naglabay og hugaw sa baboy sa dagat.
Nipasaka og kaso ang PCGDCV batok kang Santiago Tan Chan III, presidente sa Multifarms Agro-Industrial Corporation, sa kalapasan sa Presidential Decree 1067, kun ang Water Code of the Philippines ug PD 979 o ang Marine Pollution Decree.
Gipasaka kini sa maong ahensiya sa Provincial Prosecutor's Office sa dakbayan sa Sugbo atong Huwebes sa hapon, Marso 14.
Gawas sa maong kriminal nga kaso, laing kasong administratiba usab ang gipasaka sa Bureau of Fisheries and Aquatic Resources (BFAR)-Central Visayas sa maong piggery sa kalapasan niini sa Republic Act 10654 o ang Amended Fisheries Code.
Lakip ang PCGDCV inubanan ang BFAR, National Bureau of Investigation (NBI), Department of Public Work and Highways (DPWH), Regional Competitiveness Committee (RRC) sa pagserve sa search warrant sa maong piggery sa Sitio Magtalisay, Barangay Sangat sa lungsod sa San Fernando nga nilabay sa hugaw sa baboy sa dagat.
Nasayran nga gamit ang dako PVC nga tubo nga aduna'y gitas-on nga 400 metros gilabay sa maong piggery ang hugaw niini ngadto diretso sa dagat.
Pebrero 26 ning tuiga dihang na-isyu ang warrant ug nasira ang pasilidad.