NAGPOSITIBO ang usa ka pulis nga sakop sa Drug Enforcement Unit sa Mabinay, Negros Oriental sa gihimong kinalit nga drug test sa kapulisan niadtong Hunyo 2019.
Gilusad ang drug test niadtong Hunyo 28 ug ning bag-o lang migawas ang confirmatory test sa Philippine National Police Crime Laboratory sa Kampo Crame.
Nasuta nga nigamit og shabu si Police Corporal John Karl Niaga nga sakop sa Drug Enforcement Unit sa Mabinay Police Station.
Giparelibohan na sa katungdanan si Niaga, gipaimbargohan sa iyang armas ug gipabalhin sa Regional Personnel Holding Admin Unit sa Police Regional Office (PRO) Central Visayas.
Duha na ka pulis sa Negros Oriental ang nasuta nga tiggamitan sa ilegal nga drugas ug usa usab sa Mandaue City Police Office.
Gimandoan karon ni Police Brigadier General Debold Sinas ang provincial director sa Negros Oriental pagsusi kinsa ang tinubdan sa ilegal nga drugas sa maong mga pulis aron mao'y target sa ilang anti-drug operation.
"Katong duha, we are checking kon aha sila nag-source. Once we will know, gisultihan nako si PD nga i-priority ang pag-raid ato, kasi mao to ang source sa pulis," sigon ni Sinas. "Buot ipasabot nga isug-isog kaayo to ang source niya kay naa gu'y pulis nga mipalit sa iyaha."
Nasagmuyo ang heneral nga bisan sa nagpadayon nila nga kampanya ug daghan na ang nangadakpan, ang uban kanila nakalas pa apan aduna pa gihapo'y mga pulis nga mogamit niini.
Nagpadayon ang ilang internal cleansing ug gitinguha ni Sinas nga malimpyohan ang han-ay sa kapulisan sa Central Visayas gikan sa mga malambigit o nag gamit sa illegal nga drugas.
"I thought na wala na'y mogamit inspite of everything sa kadaghan sa nahuli, dagha'y gipang-relieved naa pa gihapon. Siguro na ni sa dugo mao na ako giistorya nga once hooked ka, pwede ka moundang lang kadali pero mobalik gyud ka," dugang ni Sinas.
Unang nagpositibo sa drug test si Police Staff Sergeant Ruel Sinag sakop sa Siaton Police Station sa Negros Oriental ug naa na kini karon sa PRO Central Visayas.
Silang Sinag ug Niaga nagnegatibo sa unang drug test sa miaging tuig apan ning bag-ong gilusad nga kinalit nga drug test nagpositibo na sila.
Atol sa sunod-sunod nga surprise drug test sa tanang sakop sa DEU sa Cebu Provincial Police Office, Mandaue ug Lapu-Lapu niadtong milabay nga semana, wala'y bisan usa ka pulis ang nagpositibo. (Supervoxpop Cebu)
