Moabot sa dul-an P28 milyones nga balor sa ginadiling drugas nga motimbang og 4.1 kilo nasakmit sa buy-bust gikan sa usa ka bayot pasado alas 10 sa buntag sa Miyerkules, Hulyo 7, 2021 sa mga sakop sa City Intelligence Unit (CIU) ug City Drug Enforcement Unit (CDEU) sa Lapu-Lapu City Police Office (LCPO).
Ang suspek nga giilang si Roldan Canillo Rosales, alyas Shakira, 26, taga sityo Sip-ak, Barangay Sudlon 1, Dakbayan sa Sugbo, apan nasikop Barangay Babag 2 sa samang dakbayan.
Ang Sudlon 1 gideklarar nga drug-free barangay niadtong Mayo 2021.
Si Rosales gihulagway sa kapulisan nga usa ka high value individual (HVI).
Matod ni Police Colonel Arnel Banzon, director sa Lapu-Lapu City Police Office (LCPO) nga si Shakira ilang nasubay kay gitudlo siya nga supplier sa illegal nga drugas nga nasakmit sa mga durugistang taga Dakbayan sa Sugbo nga nasikop sa ilang operasyon sa milabayng mga semana ug buwan.
Si Banzon nagtuo nga si Shakira dili maoy labing dakong supplier sa ilegal nga drugas nga kuhaanan sa mga durugista.
Giingong usa ka binilanggo sa Leyte Regjonal Prison sa Abuyog, Leyte ang contact ni Rosales.
Siya na ang moapod-apod sa nagkadaiyang mga dapit sa Sugbo.
"Maapektohan ang supply line nila padung diri sa Lapu-Lapu. Pero di gyud nato e-discount ang possibility nga kining taga Lapu-Lapu mangita nasad gyud ni og laing kakuhaan kay wala naman gyud diri sa atoa dako gyud nga nagduwa," pasabot ni Banzon.
Si Rosales nagdumili na pagtubag sa mga pasangil batok kaniya apan milakbit paghisgot nga igo ra siya gisugo pagpa deliver sa drugas.
Apan di motuo ang kapulisan tungod sa kadaghan sa illegal drugs nga nakuha.
Susihon pa sa kapulisan kun dili ba sakop si Shakira sa big time drug group.
Si Lapu-Lapu City Mayor Junard Chan sa iyang bahin mihangop sa lain na usab nga malampusong operasyon sa kapulisan.
Mao na kini ang ikatulong higayon nga nakasakmit ang kapulisan sa Lapu-Lapu og milyones nga balor sa ginadiling drugas.
Sama sa unang duha ka operasyon, plano karon sa Kagamhanan ang paghatag ug insentibo sa kapulisan kalabot na usab sa ilang nabuhat.
"Wala magpabaya ang local government unit sa pagsuporta sa atong kapulisan maong anaa kanunay ang ilang kakugi, records will show nga masikop gyud sila diri sa Lapu-Lapu, " matod ni Chan.
Taod-taod na nga nag monitor ang Cebu City Police Office (CCPO) kang Shakira.
Nangita kaniya ang kapulisan kay naa siya sa ilang listahan.
Matod ni Police Lieutenant Colonel Wilbert Parilla, deputy city director for operations sa CCPO, nga nabutyang sa target list si Shakira. Atol sa operasyon sa LCPO, kuyog ang CCPO personnel.
"Kini siya nga target same with target sa CCPO sa atoang personnel and dugay-dugay na gyud unta ni siya sigeg transact ani to close the deal. But ang lapu-lapu sad is the same gihapon ang ilang nasunod so sila ang naka close deal," matod ni Parilla.