Ang suspek sa pagpatay nga si kanhi representante sa Negros Oriental nga si Arnolfo “Arnie” Teves Jr. kumpirmadong atua sa Timor-Leste.
Si Pamplona Mayor Janice Degamo, sa usa ka Facebook post kaniadtong Biyernes sa gabii, Septiyembre 29, 2023,ni-post sa usa ka video nga nagpakita nga gigakos ni Teves si kanhi senador Emmanuel “Manny” Pacquiao sa pag-abot sa naulahi sa Timor-Leste sa miaging semana.
Ang mayor mao ang biyuda ni Negros Oriental governor Roel Degamo, kinsa gipusil-patay niadtong Marso 4 sa iyang pinuy-anan sa lungsod sa Pamplona, kauban ang siyam ka uban pa.
“Not only does this interaction raise serious ethical and legal questions, it undermines our nation’s international image,” suwat ni Mayor Degamo.
“And it demonstrates Arnie Teves’ continued disrespect for our laws and judicial system as he so brazenly flaunts his freedom while being actively hunted for the murders of 14 of our fellow NegOrenses, including my husband,” dugang ni Degamo.
Ang mga taho sa nasudnong media mikutlo sa tigpamaba sa Department of Justice nga si Mico Clavano nga nag-ingon kaniadto’ng Biyernes nga ang paggakos nahitabo pagkahuman sa usa ka higayon nga engkwentro sa airport ug nga si Pacquiao mibiyahe sa mao nga nasod sa Southeast Asia dili aron makita si Teves, apan aron motambong sa mga kalihukan diin siya giimbitar ni Timor-Leste President Jose Ramos Horta.
Niadtong Septiyembre 5, ang korte sa Manila niisyu og warrant of arrest batok sa gipalagpot nga representante sa Negros Oriental Third District ug tulo sa iyang giingong mga kauban tungod sa pagpatay kang Gobernador Degamo ug siyam pa.
Sa sayo pa, niadtong Hulyo, ang Anti-Terrorism Council (ATC) nitudlo kang Teves, iyang igsuon nga si kanhi Negros Oriental governor Pryde Henry Teves, ug 11 ka uban pa nga “terrorist individuals” human kini gi-tag si Teves nga mastermind sa pagpatay kang Degamo.
Niadtong Agusto 16, gipalagpot si Teves sa House of Representatives tungod sa iyang pagpadayon sa pagpangita og pulitikanhong asylum, sa iyang padayong dili awtorisadong pagkawala, ug sa iyang malaw-ay nga kinaiya sama sa gipakita sa video nga nagsayaw lang nga nagsul-ob sa iyang pang-ilalom nga sapot.
Si Teves balik-balik nga nagdumili sa pagsunod sa mando ni House Speaker Ferdinand Martin Romualdez nga mobalik sa nasod ug pisikal nga moatiman sa iyang trabaho, tungod sa giingong mga hulga sa iyang kinabuhi. / CTL