GIABISOHAN ang mga motorista nga moagi sa Talisay nga mobiyahe og sayo Biyernes, Agusto 30, 2019, tungod sa mahitabong lubong sa iladong radio personality ug konsehal nga si Julian "Teban" Daan.
Gipahibalo sa City of Talisay Traffic Operations Development Authority (CT-Toda) nga ilang gipaabot ang huot nga trapiko sa Barangay Poblacion ug Barangay Cansajong udto hangtod sa hapon sa maong adlawa.
Gipaabot sa CT-Toda ang mabaga nga katawhan ug mga sakyanan nga mogikan sa nagkalaing dakbayan, lungsod ug probinsya, kinsa ganahan mohatag og respeto sa namayapa nga si Teban.
Matod ni Jonathan Tumulak, pangulo sa CT-Toda, ang lubong pakahimuon alas 3 sa hapon apan i-pull out ang lawas ni Teban sa Talisay City Hall ala 1 sa hapon.
Dad-on ang lawas ni Teban sa Santa Teresa de Avila Parish sa Barangay Poblacion. Human sa misa, isunod ang paglubong sa usa ka pribadong sam-ang sa Barangay Cansojong.
Sama pa ni Tumulak nga alas 12 pa lang sa udto, bantayan na sa mga motorista ang kadalanan gikan sa Barangay Dumlog o gikan sa South Road Properties paingon sa Barangay Poblacion ug Barangay Cansojong.
Ang mga sakyanan nga gikan sa Barangay Tangke posibleng dili kalusot padulong sa Barangay Poblacion ug i-divert sila sa Rabaya Street, Sitio Kimba.
I-divert ang mga sakyanan nga gikan sa siyudad nga padulong sa Barangay Poblacion nga magsubay sa main road ngadto sa Carmen Village lapos sa Barangay Cansojong.
Matod ni Tumulak nga napanlantawan nga mas mosamot ang paghuot sa trapiko sa paggawas sa mga tawo sa simbahan alang sa paghatud sa lawas ni Teban ngadto sa Barangay Cansojong.
"Mahitabo lang kon gikan sa simbahan. Pagguwa na, magtapok ang mga tawo sa gawas sa simbahan, dili gyud kalusot ang sakyanan," matod ni Tumulak.
Gitugutan ang mga sakyanan, Biyernes sa hapon, nga mo-park sa daplin sa dalan gawas sa simbahan sa Barangay Poblacion.
Giawhag ang mga residente sa dakbayan ug mga motorista nga dad-on kanila ang pasensya tungod momugna ang grabeng kahuot sa traffic.
"Manawagan mi, sa mga adunay tuyo sa Talisay, likayan ang paggikan sa alas 12 sa udto hangtud sa hapon. Himua na sa buntag kay posibleng mabalik sa normal, alas 5 na sa hapon," sigon ni Tumulak. (Supervoxpop Cebu)
