WALA pa hingpit nga gideklarar ang panahon sa ting-init apan anaa na sa kritikal nga level ang Buhisan Dam.
Gibutyag sa Metropolitan Cebu Water District (MCWD) nga subay niini aduna'y pipila ka mga konsumidor nila sa dakbayan sa Sugbo ang maapektohan niini.
Matod sa tigpamaba sa MCWD nga si Charmaine Rodriguez-Kara nga lakip sa maapektohan mao ang mga sakaon nga dapit sa Banawa, Horseshoe Drive, Capitol Site, Oppra, Ipil-Ipil, Camputhaw, Clavano, Sambag 1, Sambag 2, F. Ramos. B. Rodriguez, Juana Osmeña, Pier Area, North Reclamation Area, M.J. Cuenco Avenue ug M. Velez Street.
Nasayran usab nga anaa nalang sa 2,000-3,000 cubic meters matag adlaw ang masupply sa maong dam itandi sa normal niini nga 5,000-6,000 cubic meters matag adlaw.
Gipanglantawan nga moubos pa kini sa umaabot nga mga semana ngadto sa 1,000 cubic meters matag adlaw.
Samtang ang Jaclupan Dam sa siyudad sa Talisay anaa nalang usab sa 27,000 cubic meters ang adlaw itandi sa normal niini nga level nga anaa sa 33,000 cubic meters ang adlaw.
Gitambagan ang publiko nga magdaginot og tubig karon nga nakasinati ang Sugbo og weak El Niño diin sa pangagpas sa Philippine Atmospheric, Geophysical and Astronomical Services Administration, makasinati ang dry spell sa buwan sa Mayo.
Ang maong mga dam lakip kini sa surface water source nga gikuhaan sa MCWD sa ilahang water source.
Sa pagkakaron moabot sa 238,000 cubic meters matag adlaw sa daily production supply ang gikinahanglan sa MCWD.(HBL)