MARTES, Marso 26, nagsaulog unta ang pamilya nga Silawan-Pardillo sa ika-17 nga adlaw nga natawhan ni Christine Lee, kinsa napalgan nga brutal nga gipatay niadtong Marso 11.
Imbes nga saulogon kini nga kompleto sa pamilya sa sulod sa balay, nangadto sila sa lubnganan ni Christine.
Naandan unta sa pamilya ni Christine Lee nga dungan nga manimba sayo sa buntag, magsalo-salo sa simple kaayo nga pagkaon, diin paningkamutan sa inahan nga si Lourdes nga mahatag ang pamarayeg ni Christine nga ice cream ug fried chicken.
Apan karon samtang nagbangutan pa sa kamatayon sa batan-on, igo nalang sa paghandum si Lourdes sa sulod sa gamay nila nga balay, diin sila kasagaran kompleto nga magsalo-salo ilabi na kon adunay okasyon.
MAGTUPAD
Gipakita ni Lourdes sa pipila ka mga tigbalita ang lugar diin sila magtupad sa iyang upat ka mga anak, diin ang susama nga salog nga katulgan, mao ra usab ang lugar diin sila magdungan og kaon.
Agig pagsaulog sa birthday ni Christine Lee, ilang giduaw ang lubong niini sa Cattleya Gardens and Memorial Park sa lungsod sa Cordova, Martes sa hapon, human usab makauli ang duha ka mga anak nga nagtungha ug ang kamagulangan nga nagtrabaho isip magtutudlo.
Human sa sementeryo, nilahos sila sa simbahan aron makapamisa sa kalag sa dalaga.
WISH SA MAMA
Birthday wish ni Lourdes alang nilang duha ni Christine, nga magiyahan ang awtoridad diha sa ilang pagpaningkamot sa paghatag og hustisya ug pagkasikop sa mga killer.
"Pero sa pagkamatay niya, memorable gyud siya sa among kinabuhi. Among iampo sa iya, nga unta, kon asa man siya (si Christine), motabang unta siya. Kahibalo man siya kon si kinsa ang nagbuhat niya sa pagpatay. Iya lang pud unta tagaan og giya ang mga tawo nga nag-imbestigar sa iyang kaso,"pamahayag sa nagbangutan nga inahan.
Si Lourdes nisaulog usab sa iyang ika 48 nga sumad sa adlaw nga natawhan niadtong Sabado, Marso 23, atol sa paglubong ni Christine.
