Wala’y import, wala’y problema para sa Northport Batang Pier human nila gipilde ang inilog nga San Miguel Beermen, 115-101, sa Philippine Basketball Association (PBA) Commissioner’s Cup sa PhilSports Arena, Pasig, Biyernes sa gabii.
Wa man tuod nakaduwa ang import sa Batang Pier nga si Venky Jois, apan nihulip og maayong performance ang local players aron aswaton ang Batang Pier ngadto sa 5-2 (win-loss) rekord.
Sa pagpahuway ni Jois tungod sa hamstring injury, nitubag sa hagit ang Asiad veteran nga si Arvin Tolentino, iyang gitimon ang Northport pinaagi sa 28 puntos nga gibidahan og 3-of-6 shooting sa tres.
Niamot si Joshua Munzon og 16 puntos, samtang ang rookie nga si Cade Flores nipakita sa iyang all-around game nga 15 puntos, 5 ka rebounds ug 5 ka assists.
Maayo pud ang giduwa ni rookie Brent Paraiso, siya nihatag og 11 puntos samtang si sophomore big man JM Calma ug beterano’ng Jeff Chan pulos mihimo og 10 puntos.
Matod ni coach Bonnie Tan nga nalipay siya sa gipakita’ng duwa sa local players, labi na ang rookie players niini nga nagpadayon sa ilang consistent game.
Dugang pa niya nga nindot pud ang gipakita nga shooting sa iyang players sa three-point area, field goal ug free throws.
Giputol sa Northport ang three-game winning run sa Beermen, kinsa nahagsa ngadto sa 3-2 rekord sa ilang unang duwa nga wala ang pambato nga si June Mar Fajardo tungod sa fractured hand.
Si Ivan Aska mihimo og 28 puntos alang sa Beermen samtang si Marcio Lassiter nitunol og 16 puntos.
