Mokabat sa 2.4 milyunes ka canisters sa butane nga mobalor og P9.6 milyunes ang nasakmit sa awtoridad su’d sa usa ka bodega nga gironda, alas 10:00 sa gabii sa Miyerkules, Nobiyembre 29, 2023, sa Phase 1, Happy Valley, Barangay Calamba, dakbayan sa Sugbo.
Ang mga sakop sa Criminal Investigation and Detection Group (CIDG) Anti-Fraud and Commercial Crimes Units (AFCCU) sa Camp Crame maoy nironda sa bodega sa Rufrance Multigas Corp. nga gipanag-iya sa dakong negosyante nga ang ngan gipugngan una ning mantalaan samtang wala pa makuha ang iyang habig.
Ang mga sakop sa CIDG-FCCU nagdala og search warrant nga giisyo ni Judge Estela Alma A. Singco-Caruso sa Branch 12 sa Regional Trial Court (RTC 7) sa Cebu City nga gipitsahan og Nobiyembre 28, 2023.
Sumala pa, ang korte nakakita og basihan kabahin sa reklamo nga ‘hoarding’ ug ‘unfair business competition.’
Ang mga reklamante mao sila si Joven Osuran, Patrolman Solomon Dultura, Maribeth Arellano, Jeneth L. Bacat, Ricardo Añasco Jr., Susana Rodriguez, Maria Elena Romey, Ramon A Cuozon, Jose Jeff. Damayo, Sheila May Ford Azenith.
Nagreprentar sila sa mga kompaniya nga nagnegosyo og butane nga nagbase sa Sugbo, kaulohan ug ubang bahin sa nasod.
Nasuta nga ang bodega sa Calamba giabangan isip pundohanan sa scrap materials apan, pulos lang empty butane canisters nga nasuta sa pagpaniid sa a CIDG-AFCCU gikan sa Camp Crame.
Ang mga canister naglangkob sa nagkalainlaing brands sama sa Botin LPG, Blue Flame, Fiesta Gas, Agila, FMZ LPG Center, Republic Gas Corp., Regasco, Philcan Refilling plants Inc., Solid R Cheaper Gas Corp, Peideworth Marketing, Petron Corp., ug JGAS Manu Gas.
Sumala sa reklamo, ang mga bakante nga butane canisters tunawon ug gituhoan nga himuon og balik nga canister apan ubos na sa ngan sa produkto sa naasoy nga kompaniya nga nagnegosyo usab og butane sud sa canister.
Atol sa pagronda sa CIDG-FCCU, gikahataho nga dunay 20 ka mga trabahante sa su’d sa bodega apan nakadagan ug usa lang ka kawani ang nasignit. Lakip sa nakasibat mao ang guwardiya sa bodega.
Ang nasikop mao si Joecad Gantalo, hamtong, taga kaulohan.
Matod ni Gantalo, tulo ka pa ka adlaw siya nga nagtrabaho sa bodega ug gisuweldohan og P400 matag adlaw, libre ang pagkaon ug pagpuyo sa bodega.
Matod niya, wala siya nakaila sa tag-iya sa kompaniya.
Samtang, dunay usa ka kawani sa usa ka trucking company nga gj-hold sa awtoridad, drayber sa usa sa upat ka mga wing van sa compound nga nagkarga og mga giguba nga canisters.
Sumala sa CIDG-FCCU, ang bodega sa Calamba walay permit sa ilang operasyon sa dapit ug gikompirmar kini sa representante sa Barangay Calamba atol sa pagronda.
Kini maoy ikaduhang pagpangronda sa kapulisan batok sa kompaniya nga gipanag-iya sa Rufrance.
UNANG GIRONDA
Niadtong Oktubre 22, 2023, nikabat sa P285 milyunes nga balor sa butane canisters ang nasakmit sa pagparonda sa kapulisan sa dakong bodega sa Cebu Rufrance Multigas sa Sitio, Batong, Barangay Danglag, lungsod sa Consolacion.
Dunay daghang canisters nga gipangpisat na ug gikatakda nga pangtunawon usab ug dunay pipila ka mga kawani ang nasikop.
Sumala sa CIDG-FCCU, ang kaso sa unang pagronda sa Consolacion naa pa nag-ung-ong sa korte.
Dugang sa CIDG-FCCU, ang mga reklamante natingala nga nagkagamay ang ilang canister nga makolekta og balik gikan sa ilang dealers tungod sa pagpalit o bugti sa paghatag og promusyon sa maong kompaniya.