Curfew ordinance alang sa mga menor de edad sa Dakbayan sa Lapu-Lapu ang pahugtan sa pagpatuman base sa kamanduan ni Mayor Junard 'Ahong' Chan.
Gipahibawo sab sa mayor nga doblehon pa ang paningkamot nga kaminusan o ang tinguha nga mahunong ang gidiling drugas nga nag-unang tumong sa pagpatuman sa curfew sa dakbayan.
Sa sayo pa, adunay nadakpan nga mga batan-on nga nalambigit sa nahitabong insidente sa pagpangulata ug pagpamanhig, gipaniguro ni Chan nga dili na masubli ang maong hitabo.
Pinaagi sa gipahugtang curfew ngadto sa kabataan masiguro nga di na sila mogawas sa lawom nga kagabhion ug mag-standby sa gawas nga magpundok pundok.
Doblehon sab ang pagpahigayon sa buy-bust ug pagdakop niadtong giila nga tigpayuhot og illegal nga drugas dakbanayan.
“Kung daghang malampusong operasyon ang atong napahigayon pag miaging tuig nga niresulta sa pagsakop sa gatosan nga kilo ug minilyon nga kantidad sa drugas, atong doblehon ang pagbantay aron wala nay mosulod nga gidiling drugas sa atong syudad gikan sa ubang lugar,” tipik sa pamahayag ni Chan, nga gi-post sa iyang Facebook page, Biyernes, Enero 10, 2025.
Masaligon ang mayor nga kon makontrol ang drugas mokunhod sab ang crime rate sa siyudad.
Sa pakigtagbo sa mayor ngadto sa mga opisyal sa city police office malinawon ug luwas nga puy-an ang dakbayan sa mga konstituente ingon man sa mga turista.
"Among buhaton ang tanan nga magpabilin kitang number one sa pinaka-ubos og crime rate sa tibuok Central Visayas," matod ni Chan.
Samtang si Police Lieutenant Colonel Christian Torres, tigpamaba sa LCPO, nagkanayon nga ang curfew sa Lapu-Lapu magsugod sa alas 10:00 sa gabii hangtod sa pagka alas 4:00 sa buntag sa mosunod nga adlaw./ RRM