Ang Colegio de San Ildefonso dinhi sa Syudad sa Sugbo maoy labing karaang eskwelahan sa nasud. Giila na karon isip University of San Carlos (USC), ang maong tunghaan gisubhan niadtong Agusto 21, 1595.
Nag-una pa ni og 41 ka tuig kaysa labing karaang tunghaan sa Estados Unidos nga mao ang Harvard University nga gisubhan niadtong 1636.
Apan gamay ra ang nakatungha niadto kay ang mga adunahan ra may naay ikagasto pag-eskwela.
Mao nga sa pag-abot sa mga Amerikanhon, usa sa ilang gihingusgan ang edukasyon. Sa petsa sab nga Agosto 21, 1901, miabot dinhi ang bapor nga USAT Thomas nga nagdala og 600 ka mga magtutudlong Amerikanhon nga gitawag og “Thomasites.”
Gisabwag dayon sila sa mga eskwelahan sa tibuok nasud.
Niadtong 1902, duna nay mga Pilipinong magtutudlo nga gisweldohan ang mga Amerikanhon.
Maong daghan tag mga nadunggan sa atong katigulangan nga mga nahimong magtutudlo bisan dili gradwado sa kolehiyo tungod lang kay maantigo sila mobasa, mosulat ug moihap.
Sa samang tuig, giaprobahan ang Akta Numero 74 nga nagtukod sa Cebu Normal School diha sa Dalan Colon diin nahimutang na karon ang Gaisano Main.
Daghan na dayon ang misunod nga mga kalamboan, sama sa pagtukod sa Cebu Provincial High School niadtong 1906 nga karon giila na isip Abellana National School. Niadtong 1910, gitukod sab ang City Intermediate School nga mao nay nahimong City Central School.
Karon, managsilingan ra gyud ang Cebu Normal University, Abellana National School ug City Central School.
Dili ra pod layo nila ang University of San Carlos, University of Cebu, University of San Jose-Recoletos, University of the Visayas, Southwestern University ug uban pa.
Layo na gyud kaayo ang agi sa Cebu sa natad sa kaalam. Sa mga pasulit, dili gyud maulahi ang mga Cebuano isip mga Topnotchers.
Tingali, tungod kini kay kita may nag-una tibuok nasud sa pagtukod og eskwelahan.
Mao nga ang edukasyon karon maoy usa ka dakung garbo ug bahandi alang sa Cebu.
