Gilaumang mo-stable sulod ning buwana ang power supply sa Visayas samtang mobalik sa serbisyo ang mga dagkong power facility, human sa mga forced outage nga hinungdan sa lapad nga rotational brownout sa tibuok rehiyon niadtong Hulyo ug Agusto 2026.
Matod ni Department of Energy (DOE) Visayas Regional Director Renante Sevilla sa phone interview sa VoxPop Cebu niadtong Martes, Septiyembre 1, hingpit na nga nabalik sa regional grid ang 103-megawatt (MW) capacity sa KEPCO-SPC Power Corporation sa Naga City.
Samtang, usa sa duha ka 169 MW units sa Therma Visayas Inc. (TVI) sa Toledo City ang nibalik na sab sa serbisyo niadtong Lunes, Septiyembre 1 human gilauman kaniadto nga mabalik kini sa operasyon sa Huwebes, Septiyembre 3.
“Ang usa, ganiha ra nag-full load, so ang unit 2 ang operational so naka-synchronize na. Na-move nila earlier,” matod ni Sevilla.
“Fully restored na ang Kepco sa Naga,” dugang niya.
Kini subay sa iyang panawagan sa publiko nga magmapailubon atol sa iyang interbyu sa media human sa State of the Province Address ni Cebu Governor Pamela Baricuatro niadtong Lunes, Agusto 31.
Nagtrabaho ang TVI aron mabalik sa full capacity ang tibuok coal-fired facility human kini nakaagi og emergency shutdown tungod sa gidudahang buslot sa boiler tube.
Matod ni Sevilla, operational na ug naka-synchronize sa grid ang Unit 2, apan wala pa’y tukmang petsa kon kanus-a mabalik ang operasyon sa laing unit.
Matod pa niya, ang matag unit sa TVI adunay kapasidad nga 169 MW.
Dugang ni Sevilla, nalangan sab ang restoration kompara sa unang target nga mahuman sa katapusan sa Agusto.
“Supposedly, ang ilang targets a two units end of August pero karon gi-extend na nila,” dugang niya.
Nadugang sa pressure sa grid ang mga outage sa lokal nga power plants tungod sab sa wala damhang pagkawala sa suplay gikan sa mga kasikbit nga rehiyon. /