Bisan gubot pa sa lukot ang kahimtang sa Metro Cebu Water District (MCWD) sa isyo sa pagdumala, apan matawag kini nga usa ka ‘blessing in disguise.’
Tungod sa kontrobersiya, mas naklaro nga dunay ‘gray area’ sa balaod sa katukoran sa MCWD, labina sa gahom ug responsibilidad sa ubang mga sanga sa kagamhanan nga dunay kalambigitan niini.
Kini sama sa lokal nga Kagamhanan sa Dakbayan sa Sugbo ug Local Water Utilities Administration (LWUA) nga dunay nagkasumpaki nga komentaryo bahin sa isyo.
Si Cebu City Mayor Michael Rama, bisan nagbakasyon sa Australia, nihimo og subling pamahayag pinaagi sa Zoom sa iyang gusto nga mapalagpot sa pwesto si MCWD chairman Jose Daluz III ug duha ka Board of Directors (BOD).
Ug ang mohulip kanila, gipahibalo ni Rama niadtong Oktubre 31, 2023, mao sila si retired Army Maj. General Melquiades Feliciano uban nila ni Aristotle Batuhan ug Nelson Yuvallos.
Apan si Daluz wala matarog sa hulga ni Rama sa paggamit sa iyang ‘police power’ hinungdan nga niadtong Martes, Nobiyembre 7, gikabalak-an nga dunay mahitabo nga pisikal nga engkwentro sa duha ka mga habig.
Salamat nga walay kagubot taliwala sa tensiyon tungod sab sa presensiya sa mga sakyanan sa Special Weapons and Tactics (Swat) palibot sa edipisyo sa MCWD sa Brgy. Sto. Niño.
Nganong niabot niining puntoha?
Si Lawyer Amando Virgil Ligutan, legal counsel sa kanhi mga sakop sa MCWD nga gitaktak sa panahon ni anhing mayor Edgardo Labella nihimo og press conference sa Miyerkules, Nobiyembre 8, 2023, niakusar kang Cebu City Mayor Michael Rama ug Daluz III bahin sa giingong “unfathomable duplicity.”
Ingon niini kalawom nga dili masukod ang komplikasyon sa pagdumala sa MCWD?
Tungod sa dili klaro , nahimong alegre ang gubat sa debate sa interpretasyon sa balaod. Maklaro usab ang duwa sa politika ug panag-ilog sa gahom.
Makaduda nga dunay laing napahipi nga dakong bulawan nga makuha sa pagkontrolar sa kompaniya?
Ubos ning obserbasyon, dunay panginahanglan sa pag-amendar sa balaod, dili lang sa MCWD, alang sa usab sa ubang semi-private utility firms sa nasod.
Asa naman ang mga magbabalaod nga kanunay mohimo og inquiry alang sa ‘in aid of legislation’?
Hinuon, mahimo kini sa korte apan taas kayo og proseso human ang Korte Suprema maoy pinal nga mohukom sa gubat sa rason ug interpretasyon sa balaod.