Grabe ang mga baha nga nasinati sa Siyudad sa Sugbo ning tuiga nga ingon sa way kasulbaran kay nagbalikbalik na.
Ang problema sa mga street dwellers wa nasulbad ug nahimo na hinuon nga suliran sa kapulisan kay pipila kanila nakahimo na og mga krimen.
Suliran kini sa nasudnon ug lokal nga kagamhanan, di unta iya sa kapulisan, apan ang mga polis na hinuon naapil na sa problema nga bisan gani ang adunahan nga mga nasod wa nakasulbad sa sama nga suliran.
Maayo unta ang pagkahakot sa mga basura, apan anha usab kini magkatag sa karsada gikan sa Brgy. Banilad hangtod sa Brgy. Binaliw diin kini ilabay.
Di lang kay kini, grabe ang kagubaon sa pipila ka mga karsada sa siyudad. Igo lang matapakan ang dagko ug lawom nga mga libaong, maguba na sab tungod sa sige og uwan. Labaw pa sa sungkaan ang ubang kadalanan.
Ang ngil-ad pa gyud kay kon dunay mga pagbaha, ang mangahabilin nga lapok ug graba taliwa sa mga karsada, pasagdan lang, kuyaw sa mga disgrasya sa mga motorista.
Naa pay grabeng kahimtang sa trapiko nga nahimong normal na lang nga kasinatian sa mga Sugboanon.
Pipila lang kini sa mga problema sa dakbayan sa Sugbo nga kada adlaw nasinati bisan sa yano nga mga lumolupyo apan kuwang kaayo ang nahimo sa Siyudad.
Apan makapahibulong kay ingon sa giuyog ni Mayor Michael Rama ang kalibutan ug langit aron lang mapalagpot sila si Atty. Joey Daluz ug kaubanan sa board sa Metropolitan Cebu Water District (MCWD). Unsay naa sa MCWD nga ingon ana man ang iyang paggukod?
Sa iyang paggukod nilang Daluz, nimugna kini og laing problema. Ang board nga gipulihan nilang Daluz nang kwestyon na sab karon sa legalidad sa pagpalagpot kanila human dunay legal nga opinyon ang Local Water Utilities Administration (LWUA) nga di diay makapanghilabot ang local government unit sa water utility.
Busa, misanga og laing problema ang tinguha ni Rama sa pagpalagpot kanila ni Daluz. Kon palingkuron niya ang iyang gipangtudlo, mahulog ni nga three-cornered fight kay naa si Daluz, tinudlo ni Rama ug ang mga gipalagpot sa panahon ni anhing mayor Edgardo Labella.
Sa kadaghan sa problema sa Siyudad, nganong kani man sa MCWD maoy gitutokan ni Rama? Tan-awa, di ba gubot pa sa lukot? Maora ba og nikuha og martilyo, gidukdok sa kaugalingon nga ulo.