Ang Cebu Bus Rapid Transit (CRBT) gibahin sa tulo ka mga package. Ang ikatulo manukad na gikan sa IT Park padulong sa Brgy. Talamban, dakbayan sa Sugbo. Molagbas kini sa Gov. M. Cuenco Ave. o nailhan nga Banilad-Talamban Road kun Bantal.
Ang mao nga karsada, nga dunay upat ka mga lane, nailhan na nga grabe ka busy tungod sa kadaghan sa mga sakyanan nga mag-agian kada adlaw. Moluag lang ang dagan sa trapiko kon molawom na ang gabii.
Kon kini nahitabo karon, unsa kahay kahimtang niini kon sugdan na ang pagtrabaho sa package 3 sa CBRT? Kon karon naghuot ang mga sakyanan, unsa na kaha kon trabahuon na ang tunga sa karsada? Kon karon nagkagidlay, mahimo na unya kini nga gubot pa sa lukot.
Sa pagsira Osmeña Blvd. alang sa CBRT, dunay mga dalan nga gipangbuksan alang sa trapiko. Naghuot tuod kini. Kon kini nahitabo sa mga sakyanan nga dunay daghang kaagian nga mga karsada sikbit sa Osmeña Blvd., unsa na kaha ang Bantal diin di kaayo ingon ka daghan sa diversion roads tungod kay ang mga interior niini nahimutangan sa exclusive nga subdivisions?
Posible kaayo nga maapil sa diversion roads ang naa sa dakbayan sa Mandaue nga sikbit niini nga karsada.
Kon nalangay ang pagtrabaho sa kapin duha ka kilometro nga package, unsa na kaha ang IT Park padulong sa Talamban?
Kon naghuot ang trapiko sa sikbit nga mga karsada sa Osmeña Blvd. nga dagko sab, unsa na kaha ang mga sikbit sa Bantal nga kadaghanan hagip-ot?
Busa ning sayo pa lang, tun-an sa Dakbayan sa Sugbo og maayo unsay buhaton kon sugdan na og trabaho ang CBRT sa Bantal. Kon unsa ka gubot ang mga karsada dinhi, maangin sab Mandaue City.
Ang nakapait ra ba sa kagamhanan, molihok lang kon duol o naa ang problema. Hinaot nga samtang layo pa, duna silay solusyon sa umaabot nga grabe’ng problema sa trapiko. Di huwaton nga moabot ang adlaw nga di na makairog ang mga sakyanan sa Bantal.