Walay angay nga bayran ang mga dialysis patient sa mga lokalidad nga may dialysis center nga gidumala sa Kagamhanan sa Probinsya sa Sugbo.
Kini maoy giklaro ni Cebu Governor Gwendolyn Garcia atol sa Caravan of Services sa lungsod sa Alcantara sa Nobiyembre 9, 2023 human siya nakadawat og reklamo sa mga pasyente sa Carcar Provincial Hospital nga gipapalit sila og mga supplies alang sa dialysis treatment sa pasyente.
Ang Kagamhanan sa Probinsya sa Sugbo nagduma sa tulo ka mga dialysis center sa tulo ka mga provincial hospital sama sa 10-unit dialysis center sa Balamban Provincial Hospital; ug 15-unit sa dialysis centers sa Carcar City sa habagatan ug Danao City sa amihanan nga puro provincial hospitals.
“Nasuko ko. Gitawag nako ang head nako sa Provincial Health Office. Ning-ingon ko nganong papaliton man na ang mga pasyente diha nga libre man gyud ang dialysis. Ang uban kuno nga supply kay wa kuno’y stock ang Carcar,” matod ni Garcia.
“Dili angay nga pabayron ang pasyente sa bisan unsa nga supply kay ang Probinsya sa Sugbo ang mopalit ana,” dason ni Garcia niadtong Huwebes, Nobiyembre 9, 2023.
Gimandoan ni Garcia ang mga nangulo sa mga hospital nga kon ugaling magkuwang ang supply sa mga dialysis center, gikinahanglang pahibaw-on niini ang Kapitolyo ug mo request og dugang supply.
Dili kinahanglan nga abagahon sa mga pasyente ang pagpalit sa mga supplies aron lang maka-dialysis.
“Kon wa maapil na sa budget adtong Carcar Provincial Hospital, i-charge sa Opisina sa Gobernador,” asoy ni Garcia pinaagi sa Sugbo News, social media news platform sa Buhatan sa Gobernador.
Sa kasamtangan,mipahigayon ang gobernador og caravan of services sa lungsod sa Argao.
Ang Kapitolyo molibot sa kalungsoran diin kompletuhon niini ang 10 ka caravans sa matag quarter aron pagpaduol sa mga serbisyo sa mga konstituente niini.
