Halos katunga sa ulo sa usa ka mag-uuma nabungkag sa pagtigbas ug patay na siya nga napalgan sa iyang kabanay sud sa iyang payag sa Sitio Cabatbatan, Barangay Pamutan, dakbayan sa Sugbo, alas 3:00 sa hapon sa Martes, Nobiyembre 7, 2023.
Ang biktima giilang si Eugene Mabano, 42, minyo, nagpuyo sa naasoy nga dapit.
Unang nakakaplag sa nagkadugo nga biktima mao ang iyang uyoan nga si Emmanuel nga daling nipahibalo sa ilang kabanay ug nitaho sa kapulisan.
Si Police Captain Rexel Yosores, deputy police chief sa Guadalupe Police Station sa Cebu City Police Office (CCPO) nga nahinabi sa Supervoxpop Cebu, nagkanayon nga ilang nadawat ang taho sa alas 6 na sa gabii sa samang adlaw.
Ang biktima maoy nahibilin sa umahan human ang iyang asawa nga si Rebecca nipauli sa ilang panimalay ug ang uyoan niini nisusi sa payag human wala makatunga sa umahan.
Ang kapulisan nagtuo nga personal ang motibo sa krimen, apan ang asawa nagkanayon nga buotan kini ug way kontra sa dapit.
Samtang ang kapulisan nakakuha og dugang kasayuran nga magmaoy ang biktima kon mahubog. Ilang palawman pa ang imbestigasyon.
Gikatakda nga ipaubos sa autopsy ang lawas sa biktima aron pagsuta sa kamatayon niini.
Atol ning pagsuwat, wala pa masuta sa kapulisan kon unsa nga hinagiban o gigamit sa pagtigbas sa nawong sa biktima sanglit grabe ang pagkagusbat niini.
“Posibling nakainom ni siya, natulog dayon gitigbas,” matod ni Yosores, nga posibling nahitabo kini sa Lunes sa gabii, Nobiyembre 6 apan alas 3 na hapon sa Martes nakit-an sa kabanay.
Wala pay matumbok nga suspek sa pagkakaron.
