Gikuha’g balik sa Miami Heat si Udonis Haslem alang sa pagpadayon sa ilang kampanya sa National Basketball Association (NBA), ning higayuna isip usa ka executive.
Nahingpit ang dugay na nga gihuwat nga lakang dihang gitudlo sa Heat si Haslem isip bag-ong vice president of basketball development.
Nahitabo kini lima mga buwan ang nakalabay gikan sa pagretiro ni Haslem, kinsa nagduwa lang sa Heat sa iyang 20 ka mga tuig sa NBA.
Sa edad nga 43, si Haslem maoy labing edaran nga aktibong magduduwa sa NBA dihang nagduwa pa siya sa miaging season.