Lalaki nga nagmotorsiklo nga giingong hubog nga nagmaniho nakadasmag og habalhabal nga niangol sa drayber ug pasahero alas 5:30 sa buntag sa Huwebes, Disyembre 21, 2023, sa Maracas, Barangay Lahug, dakbayan sa Sugbo.
Gitanggong sa kapulisan mao si Jester Gacasan, taga Nivel Hills, Barangay Lahug, kinsa nagpaila nga bokalista sa usa ka lokal nga banda.
Sa pakighinabi sa Supervoxpop Cebu sa drayber sa habalhabal nga si Ronald Mier, taga dalan B. Rodriguez, Barangay Sambag 1, dakbayan sa Sugbo, siya nagkanayon nga ni-signal siya kay moliko sa wala aron pakanaugon ang iyang pasahero nga si Ella Mae Mejares, 22, usa ka call center agent, taga Maracas.
Apan bisan pa niini, nadasmagan sila ni Gacasan.
Si Ella Mae kasamtangang nagpaalim sa tambalanan gumikan sa iyang bun-og ug sakit sa hawak.
Matod ni Mier, kinsa nipadayag nga wala ra siya maunsa, gikan sila sa JY Square samtang nagsunod kanila si Gacasan.
Si Gacasan, gihulagway ni Mier nga hubog ug gumikan sa kakusog nga nagsubida, sila naigo.
Nabunal sa karsada ang iyang pasahero nga si Mejares.
Si Patrolman Joel Cabrellos sa Traffic Enforcement Unit sa Cebu City Police Office (CCPO), nagkanayon nga nag-reckless driving si Gacasan tungod kay kusog nga nakapadagan sa motorsiklo.
Nakita ni Cabrellos ang botelya sa beer nga naa sa motorsiklo ni Gacasan.
Ang beer giablihan nang daan ug si Gacasan nanimaho usab og beer dihang nahinabi sa kapulisan.
