Nagkanayon si Japanese Naoya “Monster” Inoue nga naa siya sa labing maayo niyang kondisyon kabahin sa iyang unification bout batok kang Filipino Marlon Tapales karong Disyembre 26, 2023 sa Tokyo, Japan.
Mao kini ang gipadayag ni Inoue sa interbyo sa Kyodo News.
Ning awaya, isugal ni Inoue ang iyang World Boxing Council (WBC) ug World Boxing Organization (WBO) super bantamweight titles alang sa World Boxing Association (WBA) ug International Boxing Federation (IBF) super bantamweight belts ni Tapales.
Gipasabot ni Inoue nga mas madasigon ug mas determinado siya sa training ning higayuna kumpara sa miagi niyang mga away.
Kon modaog si Inoue ning awaya, hayan makuha niya ang iyang ikaduhang undisputed title sa lahi nga weight division.
Una niya kining nahimo sa bantamweight division.
Matawag nga undisputed champion ang usa ka boksidor kon malangkat niini ang tanang upat ka mayorihiyang mga titulo.