ALAS dos sa hapon dihang nagkasabot ang magtiayong Henry-Neneng nga mangaligo sa dagat uban sa tulo nila ka anak. Giandam dayon nila ang ilang bawon ug ubang kinahanglanon sa pagpangaligo. Unya luwan sa kaugalingon nilang dyip de gasto nangadto sila sa Palm Beach, usa ka sikat nga kaliguanan sa barangay Marigondon.
Taudtaod gyud ang ilang biyahe kay layo-layo man kini gikan sa ilang gipuy-an sa Purok Lemonsito, barangay Gun-ob. Ug sa ilang paghiabot, namili dayon silag cottage. Maoy ilang napilian kadtong duol sa punoan sa talisay kay bugnaw.
"Dili lang ta dinhi, Hen, uy, kay taw-an ra ba kuno nang kahoy nga talisay," misupak si Neneng.
"Sus, tuo na man nimo niana. Wa na kana karong panahona, uy!" insister ni Henry.
Wala na lang usab motingog ang asawa kay di siya buot nga magkasumpaki sila ni Henry. Mawala unya ang ilang gana sa pagpangaligo. Nia ra ba sila dinhi aron maglingaw-lingaw.
Dili kaayo daghan ang nangaligo niadtong tungora. Maihap lang ang mga cottage nga okupado. Adlawng Biyernes man god. Lahi ra kaayo kon itandi sa adlawng Dominggo nga magpunsisok ang mga tawo nga maglulinghayaw sa beach. Aduna gani uban nga dili na makakuhag og cottage ug anha na lang daplin sa baybayon nga mogamit og dakong payong kon init ang panahon.
Nalingaw kaayo nga nangaligo sila Henry ug Neneng uban sa ilang mga anak. Si Neneng ang mikaligo sa ilang kamanghuran nga babaye nga duha pa ka tuig ang edad. Samtang si Henry ang nagbantay sa mga maguwang nga lalake nga nagpanuigon og utso ug singko anyos.
Taliwala sa ilang pagdayak sa malinawong dagat wala lang nila maalinggati nga inanay nang mitikyop ang kangitngit. Hapit na ang ikaunom nga takna sa kagabhion. Mao nga nakahukom na silang mangundang ug mamauli.
Gipangilisan nila ang kabataan ug pagkahuman sila na usab ang nag-ilis sa ilang hinumod. Unya ilang gipanghipos ang mga galamiton nga nagkatag sa talad sa cottage. Pero dihang mogikan na unta sila luwan sa dyip nga gipahiluna sa unahan, namatikdan ni Henry nga wala mahikuyog kanila si Nonoy, ang ilang panganay.
"Hain man diay si Nonoy, Neng?" nangutana siya sa asawa.
"Ambot lang," mubong tubag ni Neneng nga giabot og kabalaka.
"Balika kuno didto sa cottage basig tua ra didto," sugyot ni Henry nga nahingawa.
Giadto ni Neneng ang cottage nga ilang giabangan apan wala siyay nakitang Nonoy. Misamot ang iyang kakulba. Nagtuo si Henry nga nadala og laing nangaligo ang ilang anak. Busa namauli na lang sila ug gipahibawo sa kapulisan ug gipasibya sa radyo ang pagkahanaw sa ilang panganay.
Apan miabot na lang ang alas diyes sa gabii. wala pa mahipalgi si Nonoy, hinungdang nakahukom si Henry pagbalik sa Palm Beach sa Marigondon, pamasin nga atua ra didto ang bata. Tuod man, mao na lang ang kalipay ni Henry kay didto ra man diay si Nonoy sa cottage nga ilang giabangan – natulog sa lingkoranan. Gipukaw kini ni Henry.
Labihang lipaya ni Neneng pagkakita sa anak nga kauban na sa amahan. Iya kining gigakos pag-ayo nga samag walay hangin nga nakalusot.
"Nagtuo ko, Hen, nga gitiawan kita sa nagpuyo sa kahoyng talisay duol sa cottage," ni Neneng human mahalog ang bata.
Igo rang mitutok si Henry sa asawa ug naglingo-lingo. Dili man siya gustong motuo sa gipanulti ni Neneng, apan morag tinuod ang nahitabo.
(KATAPUSAN)
