Ka SuperSuroy nasayod ka ba nga adunay nadugang nga atraksyon sa labing karaang fort dinhi sa nasod?
Dinhi sa dakbayan sa Sugbo nahimutang ang usa sa labing karaang fort, ang Fort San Pedro nga anaa sa dalan A. Pigafetta, duol sa Plaza Independencia, Cebu City.
Sa mga nakasuroy na sa maong historical landmark ug sa kadtong wala pa, adunay bag-ong atraksiyon nga gidugang nga maghatag og nostalgic feels diin mahandom ang kasaysayan.
Adunay grupo sa Re-enactors nga nag sul-ob og nagkadaiyang mga uniporme sa karaang panahon nga nagsilbing sundawo sa karaang panahon.
Ang nagkadaiyang gisul-ob nga uniporme sa mga Re-enactor nagrepresentar sa nanglabay’ng mga panahon o era.
“We promote local history by wearing periodical costumes,” tipik sa natala sa Facebook page sa La Liga Cebu Re-enactors Group.
Ang Re-enactors group anaa sa Fort San Pedro matag Sabado ug Dominggo.
KASAYSAYAN
Ang Fort San Pedro saksi sa mga makasaysayanong hitabo sa Sugbo nga sukad pa sa pre-colonial period hangtod na ning modernong panahon.
Ang kuta, nga gingalan sunod sa flagship ni Legazpi nga San Pedro, mao ang labing gamay ug labing karaan nga kuta sa nasod ug nanalipod sa isla gikan sa mga Moro raider.
Nagsugod kini isip usa ka triangular nga balwarte sa dihang kini mao pay unang gitukod gamit ang mga troso ug lapok niadtong 1565. Apan gihulagway sa 1739 nga taho ngadto sa Hari sa Espanya, ingong triangular ang porma, hinimo sa bato ug lusong, ug adunay tulo ka mga balwarte nga ginganla’g La Concepcion, (habagatan-kasadpan nga bahin), Ignacio de Loyola (habagatan-sidlakan), ug San Miguel (amihanan-sidlakan).
Kini usab ang sentro sa unang Katsila nga komunidad nga nailhang Villa San Miguel.
Sa pagsugod sa ika-20 nga siglo, kini saksi sa pag-abot sa mga Amerikano nga naghimo sa kuta nga ilang baraks. Sa pag-agi sa hapit tunga sa siglo (1941-1945), nangabot ang mga Hapon ug gihimo usab kini nga ilang kampo.
Sa pagkatinuod, uban sa mga torre sa 30 ka mga tiil ang gitas-on, ang kuta nakaalagad og maayo sa nagkalainlaing mga lumulupyo niini. Sa panahon sa mga Amerikano, ang ubang lawak nahimong lawak-klasehanan.
GIPALAMBO
Sa tunga-tunga sa 1950s, ang Cebu Garden Club niusab sa sulod nga korte ngadto sa usa ka gamay nga tanaman.
Paglabay sa mga tuig, ang kuta adunay mga hayop gikan sa zoo sa lungsod.
Nilampos ang mga Sugboanong rebolusyonaryo sa pagbawi sa dakbayan sa Sugbo, ang mga Katsila nanago sa Fort San Pedro, salamat sa maampingong pagplano ni Leon Kilat.
Haom sab ang maong lugar alang sa educational tours nga kahatagan og higayon ang mga tinun-an o ang ubang mga turista sa paglili sa kagahapon sa Sugbo. /