Gawas sa atong local tourist spots, angay sab natong suroyon ang karaang mga istruktura nga adunay istorya sa kagahapon dungan sa paglili sa kasaysayan sa nasod.
Niining edisyon sa atong Super Suroy, atong ibida ang mga nasudnong bahandi sa Pilipinas nga adunay dakong papel sa paghipos sa mga kabilin, kasaysayan ug kultura.
Sa Agusto, gisaulog ang National History Month ug Buwan ng Wika ug atong ibida ang tulo ka mga istruktura; National Museum of Fine Arts, National Museum of Anthropology ug National Museum of Natural History.
National Museum of Fine Arts - Ang monumental nga Old Legislative Building karon naila na nga National Museum of Fine Arts.
Ang edipisyo gidesinyo ni Ralph Harrington Doane, Antonio Mañalac Toledo ug Juan M. Arellano, gitukod niadtong tuig 1918-1926. Nasayran nga niadtong Pebrero 1945, ang mga puwersa sa mga Hapon ninggamit sa building ug sa mga lugar niini isip ilang kuta ug gihimo nilang instalasyon sa depensa.
Karon ang museyo mao ang gibutangan sa 29 ka galleries ug hallway exhibitions nga ginama sa mga 19th century nga Pinoy masters, national artists, sama sa mga pintor, eskultor, ug tig-imprenta.
Anaa sab makita ang art loans nga gikan sa ubang government institutions, organisasyon ug mga indibiduwal.
Ang maong edipisyo nahimutang sa Padre Burgos Ave., Barangay Ermita, Manila nga bukas gikan sa alas 9:00 sa buntag ngadto na sa alas 6:00 sa gabii matag adlaw, apan sa Lunes sirado ang maong museyo.
National Museum of Anthropology - Ang National Museum Complex, pinaagi sa Republic Act 8492 niadtong 1998, ang unang yugto sa National Museum complex natuman pinaagi sa pormal nga inagurasyon sa Museum of the Filipino People ug gihimong Old Finance Building, usa ka importanteng bahin sa opisyal nga pagsaulog sa centennial sa kagawasan sa Pilipinas nga gipahigayon niadtong Hunyo 12, 1998.
Karon, ang building nagpahigayon sa Philippine ethnographic ug terrestrial ug underwater archaeological collections nga nagsaysay sa istorya sa Pilipinas gikan sa nangagi, nga gipresentar pinaagi sa artifacts isip ebidensya sa pre-history niini ug karon gitawag na og National Museum of Anthropology.
Kini nahimutang P. Burgos Drive Rizal Park, Teodoro F. Valencia Cir, Ermita, Manila nga bukas gikan sa 9:00 sa buntag ngadto na sa 6:00 sa gabii matag adlaw, apan sa adlawng Lunes sirado ang maong museyo.
National Museum of Natural History - Ang building gitukod isip Agriculture and Commerce Building niadtong 1940 ug gidesinyo sa neoclassical nga estilo ni Filipino Architect Antonio Toledo sa ulahing bahin sa 1930s, nga adunay parehas nga dimensyon ug floor plan sa iyang twin building ang Finance Building.
Sa wala pa kini gibuksan sa publiko niadtong Hunyo 28, 2016, ang National Museum of Natural History unang gilusad pinaagi sa ceremonial turnover sa Tree of Life, nga gipangulohan ni anhing Presidente Benigno Aquino III pinaagi sa iyang cabinet secretaries isip mga representante. Kini adunay konsepto sa pagpresentar sa mga koleksyon niini gikan sa bukid ngadto sa dagat, nga gipakita pinaagi sa interactive nga mga pasundayag, mga giya sa video, mga diagram, ug mga ilustrasyon nga gisagol sa zoological, botanical, ug geological specimens nga gipakita sa 12 ka mga galeriya ug sa mga hawanan niini.
Karon, usa kini sa labing gibisita nga mga destinasyon sa mga turista nga pang-edukasyon sa Metro Manila.
Nahimutang duol ra sab sa Rizal Park kun Luneta ug alang sa inyong kasayuran ang nasudnong museo ang entrance libre. /