Usa ka American national gipriso sa Naga City Police Station human kini giingong nag-wild alas 9 pasado sa gabii sa Biyernes, Disyembre 8, 2023 sa Brgy. Poblacion East, siyudad sa Naga.
Ang langyaw giingong nanukmag ug namato atol sa pagbukas sa Pasko sa Naga pinaagi sa Switch On of Lights nga gisaksihan sa gatusan ka mga tawo.
Ang suspek giila nga si Sergio Corbalan, 52, minyo, kasamtangang nagpuyo sa Modena, Brgy. Tungha-an, lungsod sa Minglanilla. Samtang ang mga biktima nga managsuon giila nga sila si Julius Salidaga, 36 , minyo, taga Brgy. Ylaya, San Fernando Cebu, ug si Andrea, 28 , dalaga, taga Brgy. Bulacao, siyudad sa Sugbo.
Sa imbestigasyon sa kapulisan ubos sa kamanduan sa ilang hepe nga si P/Lt. Col. William Humoc, si Corbalan gituohan nga hubog. Dihang nag-wild, naatlan nga diha sa duol ang magsuon nga Salidaga nga nanan-aw sa switch on.
Giingon nga sa way igong hinungdan gisumbag si Julius samtang si Andrea gilabay og bato. Atol sa hitabo, dunay mga polis nga diha sa duol nga gipangulohan ni P/Master Sgt. Jake S. Catane, dali nga nakontrolar ang langyaw.
Ila kining gidakop ug gidala sa police station.
Kon wa pa didto ang kapulisan, hayan mas daghan pa ang naigo sa pag-wild sa langyaw.
