Laing King Cobra o Banakon nga nitukob og sawa natigbasan-patay sa usa ka lumolupyo sa Brgy. Magsico, lungsod sa San Fernando, alas 8 sa buntag sa Miyerkules, Disyembre 27.
Sa pagkighinabi sa Supervoxpop Cebu kang Stephen Baringui-an nga maoy ni-post sa Facebook, iyang giila ang nakasugat sa Banakon nga si Gabino Generalao, hamtong.
Matod niya nga nanguha og lawog si Generalao alang sa iyang mga kahayupan sa eco-farm sa maong dapit.
Iyang nakit-an ang Banakon nga may gitukob nga sawa. Sa kahadlok ni Generalao, iya kining gitigbas hangtod nga namatay apan ang sawa napatay nang daan sa Banakon
Sa Nobiyembre, usa ka King Cobra nasikop sa usa ka residente sa Barangay Guadalupe, dakbayan sa Carcar. Lain usab ang ang nanggukod og sawa apan napatay sa usa ka tagbalay sa Brgy. Lamacan, Sibonga.
