Wa dayon mosalir ang pagbalik ni Lebron James sa lineup sa Los Angeles Lakers human sila latigoha sa Chicago Bulls, 146-115, sa National Basketball Association (NBA) regular season game didto sa Los Angeles, California, Marso 23 (PH time).
Si James absent og duha ka semana ug wala sa pito ka duwa sa Lakers tungod sa strained left groin.
Sa iyang pagbalik, mikamada kini og 17 puntos. Miangkon si James nga bakikaw ilang gipakita nga duwa batok Bulls.
“We’ve got to play better basketball than we did tonight, and what we did on our last road trip,” batbat ni James.
Nakabalik pud sa Lakers lineup si starting forward Rui Hachimura, kinsa mipahuway og 12 ka duwa tungod sa knee injury. Pero, bisan pa kompleto ang pwersa sa Lakers, wa kini makapahinay sa inspirado nga Bulls.
Misandig ang Bulls kang Coby White nga mipakatap og 36 puntos, miabag si Josh Giddey og hapit quadruple-double nga 15 puntos, 17 assists, 10 rebounds ug walo ka steals.
Samtang si Matas Buzelis midugang og 31 puntos sa Bulls.
Ang Lakers gipangulohan sa 25 puntos ni Austin Reaves.
Sa habig ni James, iyang gibutyag nga kinahanglan pa bantayan ang iyang injury para makuha ang 100 percent recovery.
“I just take it day by day,” sigon nj James “I can't work out what's going to happen in the future, but obviously I got some work on it today. Hopefully a little more on the plane. It's a long flight to Orlando, and then I'll get ready for Monday. I hope it's behind, but I won't look too far in the future.”
Ang Bulls (31-40) naa sa ikasiyam nga pwesto sa East team standings, samtang ang Lakers (43-27) naglingkod sa ikaupat nga pwesto sa West. / RSC
