Grabe ang kahimtang sa usa ka mag-uuma nga gidala sa ospital sa dihang nakaangkon og mga samad tinigbasan sa nagkalainlaing bahin sa iyang lawas, sa Sitio Tabok 3, Barangay Adlaon, bukirang bahin sa Siyudad sa Sugbo.
Ang insidente nahitabo sa alas 12:00 sa tungang gabii, Martes, Marso 25, 2025.
Si Barangay kagawad Ludilito Gabud nipahibawo sa kapulisan sa hitabo ug naabtan ang nagkadugo nga biktima nga si Adolfo Laurito Jr., 45, biyudo, taga Sitio Patag, Barangay Guba, nga walay panimuot sa may kawayanan.
Ang suspek giila nga si Juan Arcayan Bordadora, 37 , ug giingong aduna nay daan nga bikil tali sa biktima.
Base sa inisyal nga taho, nakahigayon pa og dagan ang biktima ug nasum-ok sa kawayanan kinsa anaa karon sa tambalanan sa Cebu City samtang gipangita pa si Bordadora. / DVG
