Mga duwa karon:
12: 30 P.M DBTC batok USC (High School)
2:00 PM CITU batok CEC (High School)
3:30 PM CITU batok Verallo College (College)
5:00 P.M SWU-Phinma batok UP-Cebu (College)
Gikompleto sa defending champion Sacred Heart School-Ateneo de Cebu (SHS-AdC) Magis Eagles ang kulbahinam nga come-from-behind win batok sa University of Southern Philippines-Foundation (USP-F) Baby Panthers, 59-58, sa Cebu Schools Athletic Foundation Inc. (Cesafi) juniors’ basketball tournament sa Cebu Coliseum kagahapon, Sabado, Oktubre 14.
Gipapas sa Magis Eagles ang double-digit lead sa Baby Panthers sa fourth quarter sa pagpangulo ni star guard Jared Bahay nga nakahimo og duha ka clutch baskets aron ituboy sa kadaugan ang iyang team.
Napasulod ni Bahay ang go-ahead corner three-pointer sa uwahing bahin sa duwa nga maoy nakasilyo sa kadaugan sa Magis Eagles, 59-58.
Sa wa pa ang winning play, si Bahay pud ang nakatabla sa iskor ngadto sa 56-all pinaagi sa iyang two-pointer nga napakapinan pa og foul. Wa hinuon masulod ang free-throw pero nakuha ni Bahay ang rebound.
Nakaitsa pa ang Magis Eagles apan sipyat kini ug nakuha sa Baby Panthers ang posisyon nga wa pud nila usiki kay nakapasulod man og two-pointer aron makuha pagbalik sa USPF ang labaw, 58-56.
Human sa timeout, naabli si Bahay sa corner three-point area ug wa gyud pakyasa sa high school MVP ang Magis Eagles nga maoy nakapalanog sa viewing fans sa Cebu Coliseum.
Ang Ateneo gilubong og double digit sa USPF sa sayong bahin sa fourth quarter, 34-49.
Naglabaw pa unta og unom ang USPF, 56-50, sa nahabiling 1:36 sa duwa, apan hingpit na kining napapas sa Ateneo.
Karong adlawa, magsangka ang Southwestern University-Phinma Cobras ug University of the Philippines (UP)-Cebu sa college division.
Sa laing college matchup, magtigi ang Cebu Institute of Technology-University (CITU) Wildcats ug Verallo College.
Samtang ang magduwa sa high school division mao ang Don Bosco Technology Center (DBTC) Greywolves kontra University of San Carlos (USC) Baby Warriors, ug CITU Wildkittens batok Cebu Eastern College.
