“Ang pag-graduate sa Pantawid Pamilyang Pilipino Program (4Ps) timailhan nga among nabuhat ang mga maayong lakang nga makahaw-as kami sa kalisud. Bisan pa man sa mga kalisdanan, nagpabilin kaming positibo inubanan sa among pagkugi ug pag-ampo sa Ginoo,” matod ni Regen Lagudas, 34.
Paambit ni Regen nga financially stable na ang ilang pamilya pinaagi sa ilang natukod nga negusyo, ug makabarog na sila nga walay interbensyon sa 4Ps. Siya ug ang iyang bana nga si Felmor determinado nga makahaw-as sa ilang pamilya gikan sa kawad-on.
MAGTIAYON
Sila si Regen ug Felmor nagkita ug nagkaila sa Lungsod sa San Juan, Siquijor.
Si Felmor usa ka tricycle driver ug si Regen usa ka service attendant sa Coco Grove Resort nga usa ka inilang beach resort sa isla.
Ang duha nagkauyab ug nagkasabot nga magminyo niadtong Mayo 15, 2009.
Human sa kasal, ang magtiayon nagpabilin sa mga ginikanan ni Felmor tungod kay wala pa sila makatukod og kaugalingon.
Sa kadugayan, namabdos si Regen sa ilang unang anak ug mihunong sa pagtrabaho isip service attendant.
Samtang si Regen nag-atiman sa ilang anak, si Felmor nagpadayon sa pagtrabaho isip tricycle driver aron makagasto.
Ang magtiayon nanlimbasug aron matagan-an ang ilang inadlaw-adlaw nga panginahanglan niadtong unang mga tuig sa kaminyuon.
“Adunay panahon nga kami wala'y igong pagkaon o sobra nga kuwarta aron ipalit sa importanteng mga butang, apan nagpabilin kaming lig-on ug nagdaginot sa among mga kahinguhaan,” matod ni Regen, nga nahinumdom sa ilang mga kalisod.
Paglabay sa usa ka tuig, namabdos pag-usab si Regen sa ilang ikaduhang anak ug nahutdan og tinigom ang pamilya aron ikasustento sa ilang duha ka anak.
Kay wala nay laing panginabuhian, nakahukom si Regen nga manimpalad sa bag-ong negosyo pinaagi sa pag-abli og sari-sari store sa Barangay Napo sa San Juan.
Ang magtiayon hilig nga adunay ilang kaugalingong negosyo. Apan, tungod sa kalisod sa panalapi, wala sila makasugod dayon.
Sa ulahi, nipalit una sila'g pipila ka grocery items depende sa extra income nga natigom ni Regen gikan sa trabaho sa iyang bana.
BENEPISARYO
Ang pamilyang Lagudas nahimong benepisyaryo sa 4Ps niadtong 2015 ubos sa Set 7A. Ang duha ka bata nga sila si Real ug Earl nagsugod sab sa ilang elementarya.
Si Regen nigamit sa cash grants nga ilang nadawat gikan sa programa alang sa panglawas ug edukasyon nga panginahanglan sa iyang mga anak.
Si Regen usa usab sa mga aktibong 4Ps grantees nga sige og tambong sa binuwan nga Family Development Session (FDS) nga naghisgot sa lainlaing developmental topics nga gituki sa mga trabahante sa Department of Social Welfare and Development (DSWD) ug uban pang partner stakeholders.
Tungod niini, giaplay ni Regen sa iyang pamilya aron matabangan sila nga mahimong igo sa kaugalingon.
PANDEMIYA
Sa panahon sa pandemiya sa Covid-19 niadtong 2020, nga walay turista nga mibisita sa isla, si Felmor kinahanglang mohunong sa pagtrabaho isip tricycle driver.
Ang pamilya niadto sa pagpamuhi og baboy ug pagpalit-ug-baligya sa usa ka produkto sa soft drink sa ilang komunidad.
Sa 2021, nakahukom si Felmor nga magtrabaho isip 'tuk-tuk' driver sa Coco Grove Resort aron masustiner ang ilang mga panginahanglanon sa pamilya ug mapauswag ang ilang kahimtang sa kinabuhi.
Gitutokan ni Regen ang pagpalambo sa ilang sari-sari store ngadto sa mini-grocery store.
Pinaagi sa ilang hiniusang paningkamot ug kinitaan, hinayhinay silang nakatukod sa ilang kaugalingong gipangandoy nga balay nga konkreto ug makasugakod sa bagyo.
TEAMWORK
Si Regen maoy nag-atiman sa ilang general merchandise store ug duha ka tuk-tuk nga adunay average daily profit nga P2,000. Si Felmor padayong nagtrabaho isip drayber sa duol nga resort.
Ang pamilya adunay insurance sa Social Security System (SSS) nga naghatag og kalig-on sa ilang pinansyal nga kahimtang. Ang ilang duha ka anak nga lalaki nga sila si Real ug Earl, anaa na sa Grade 9 ug Grade 8. Ang duha ka mga estudyante nagpakita sa ialng paningkamot ug dedikasyon sa pagtuon nga nagpasabot sa ilang tinguha nga magmalampuson sa eskwelahan.
“Pagkahuman sa walo (8) ka tuig sa programa, kami mapasalamaton sa pinansyal nga suporta ug kahibalo nga among nakuha pinaagi sa 4Ps. Isip usa ka gradwado sa 4Ps, makabarog na kita ug makapadayon sa pagpatunhay sa kalambuan sa atong kinabuhi, pagsiguro sa kaugmaon sa atong mga anak,” matod ni Regen. / PR / RRM