Nangayo og pasaylo kang Gobernador Gwendolyn Garcia ang mga bus ug minibus operator nga nagbiyahe sa habagatan sa Sugbo, kansang mga unit nakahimo og traffic violations.
Gipahibawo sa Cebu Provincial Information Office nga atol sa pakigtagbo sa mga operator tali ni Garcia, pormal sila nga miduso sa ilang pagpangayo og pasaylo.
Uban usab sa hangyo sa pag withdraw sa gobernador sa iyang giduso nga complaint sa Land Transportation Franchising and Regulatory Board (LTFRB-7).
Una na nga nihangyo si Garcia sa LTFRB 7 nga kanselahon ang Certificate of Public Convenience (CPC) sa mga operator tungod sa mga violations niini,.
Naglakip sa violations ang illegal parking, illegal loading ug unloading sa mga pasahero sa gawas sa CSBT nga niresulta sa kamatayon sa usa ka pasahero niadtong Oktubre.
Ang pasahero nga lalaki nga kawani sa Dept. of Education (DepEd) nikapyot sa usa ka bus apan natapigas ang tiil hinungdan sa iyang pagkatagak ug naligsan.
Nakaaghat kini sa Cebu City Transportation Office (CCTO) sa pagpahugot sa pagbantay sa trapiko sa dapit kay kini kalapasan.
Si Garcia nibutyag nga iya unang timbangtimbangon ang hangyo una siya mopakanaug og desisyon, kauban ang mga sakop sa Hunta Probinsyal ingon man ni Bise Gobernador Hilario Davide III.
Makadaghan na gitawag ni Garcia ang atensyon sa bus operators apan daghan gihapon nga drivers ang naglapas sa polisiya nga sa sulod lang sa CSBT pwede magpasakay og mga pasahero.
