Gawas sa motorsiklo, ang ubang matang sa sakyanan gidid-an una paggamit sa Metro Cebu Expressway sa bukirang bahin sa dakbayan sa Naga tungod sa pag-ayo sa usa ka bahin sa dan nga nahunlak.
Apan limitado ang oras sa mga motorsiklo gikan sa alas 6:00 sa buntag hangtod sa alas 6:00 sa gabii matag adlaw.
Kini ang unod sa Executive Order (EO) 25 nga giluwatan ni Cebu Governor Gwendolyn Garcia niadtong Martes, Nobiyembre 7, alang sa kaluwasan sa mobiyahe sa bag-ong dan.
Kini human sa pagdahili sa yuta sa nahisgutang karsada nga niresulta sa mga liki ug delikado sa mga motorista, lakip na sa mga residente.
Niadtong Martes, si Garcia uban ni Naga City Mayor Valdemar Chiong nakigtagbo sa mga opisyal sa Department of Public Works and Highways (DPWH 7), naghisgot sa assessment sa kahimtang sa dalan.
Si Garcia nimando sa temporaryong pagpahunong sa civil works sa proyekto ug pagbalhin una sa mga apektadong residente sa mas luwas nga lugar.
Kapin sa 200 na ka mga pamilya ang gipabakwit sa Dakbayan sa Naga ngadto sa tunghaan sa Cantao-an sukad nagsugod ang mga landslide.
Usa ka bahin sa Phase 3A sa expressway project sa Barangay Inayagan ug Cantao-an sa dakbayan sa Naga nakasinati og pagdahili sa yuta tungod sa kanunay nga pag-ulan sa Oktubre.
Si Garcia nihangyo sa DPWH 7 nga maoy mogasto sa relokasyon sa mga apektadong residente diin ang naulahi nisaad nga abagahon og P100,000 sa matag apektadong pamilya.
Niadto lang katapusang semana sa Oktubre gipasirhan ni Garcia ang expressway human siya nasayod sa paghulpa sa karsada ug landslide sa mga kilid niini.
Nasayran sa Supervoxpop Cebu nga ang Phase 3A sa expressway project dunay gitas-on nga 17 kilometros padulong sa dakbayan sa Talisay gikan sa Naga apan sa pagpakakaron, lima ka kilometros ang natapos.
Kini kabahin sa una sa tulo ka hugna sa kinatibuk-an proyekto nga kapin sa 70 ka kilometros nga karsada padulong sa dakbayan sa Danao gikan sa Naga.
Ang Metro Cebu Expressway nag-agi sa bukirang bahin isip alternatibong dan aron ma-decongest ang traffic sa naandang coastal highway.