Nawong sa lalaki nga nibalibad sa tagay gibunalan og baso alas 10 sa gabii sa Dominggo sa Brgy. Jaguimit, dakbayan sa Naga.
Si Dante Sagome, hingkod, construction worker sa nahisgutang lugar, nagisian sa nawong ug kilay.
Nasikop ang suspek nga si Eric Baron, 30, iyang kauban nga construction worker.
Si Police Staff Sgt. Jake Catane, imbestigador sa Naga City Police Station nga nahinabi sa Supervoxpop Cebu, nagkanayon nga ang suspek gikan sa Christmas party sa beach.
Nag-abot sila sa iyang silingang biktima alas 7 sa gabii sa Dominggo, Disyembre 17, nga gikan sab nag-inom uban sa laing higala.
Matod ni Catane nga ang suspek maoy nagtagay sa beer hangtod sa alas 10 sa gabii.
Ang biktima wala na modawat sa gitagay, nibalibad kay sakto na ang gidaghanon sa iyang nainom.
Tungod niini, nahitabo ang ilang panaglalis, nagkagubot hangtod nagsinumbagay.
Ang suspek nikuha sa baso, gilabay sa nawong sa biktima.
Nakaangkon og dakong samad sa nawong ug kilay si Sagome.
“Nainsulto daw siya kay gibalibaran iyang gitagay. Nagkalamoklamok, iyang gilabay ang baso sa nawong,” asoy ni Catane base sa saysay sa suspek.
Ang suspek nipadayag nga nainsulto siya sa reaksyon sa biktima sanglit siya na lang ang makainom sa gitagay.
Wala modawat ang suspek sa rason sa biktima.
Giisip niya nga bati ang pagbalibad sa iyang tanyag.
Sumala ni Catane nga kasong slight physical injuries ilang giandam batok sa suspek.
