Namatay ang sakay sa usa ka multicab samtang ang drayber wa maunsa dihang nabangga mga alas 11 pasado sa gabii sa Lunes, Nobiyembre 6, 2023 sa pader sa tindahan sa sityo Lower, Brgy. Busay, dakbayan sa Sugbo.
Ang namatay giila nga si Junel Arcilla, 34, ulitawo, taga Brgy. Pung-ol Sibugay, dakbayan sa Sugbo.
Samtang ang drayber nga gidudahang hubog samtang nagmaniho sa multicab giila nga si Randy Parinasan, 48, minyo, silingan ni Arcilla.
Matod sa usa ka imbestigador nga si Parisan nagpadulhog sa multicab apan kalit nga nilahos ang iyang gimaneho nga multicab dayon nibangga sa tindahan ni Jonathan Lañas, minyo.
Si Arcilla maoy nagrabihan kay diha sa passenger side sa front seat naglingkod nga maoy naintimano sa impact sa bangga.
Matod ni Belinda Lañas, asawa ni Jonathan, sa chat sa Supervoxpop Cebu, nga samin sa multicab nga nabuak ang nakaingon sa samad ni Arcilla.
Patay nang niabot sa tambalanan si Arcilla.
Ang duha gikataho nga paingon nga mobilar sa usa nila ka kaila.
Si Parinasan gitanggong sa Malobog Police Community Precinct samtang giandam pa ang kaso nga ipasaka batok kaniya.
Wa pay sumada kon pilay danyos sa tindahan sa magtiayong Lañas.
