Usa ka gituohang hubog nga lalaki ang nalumos dihang naligo sa dagat napalgan sa hunasan sa Sitio Lawis, Barangay Daanglungsod, Dakbayan sa Toledo, pasado alas 7:00 sa gabii sa Lunes, Abril 21,2025,
Ang maong lalaki nailhan nga si Felix Ruben Rosento Jr., 39, minyo, ug molupyo sa Purok I sa naasoy nga barangay sa Toledo.
Sa inisyal nga imbestigasyon sa Toledo City Police Office, ilang nasayran nga giingong nakainom ang biktima ug nisalom siya sa kadagatan sa naasoy nga dapit uban ang usa niya ka higala.
Apan niadtong higayona, giingong dagko ang bawod ug sug ang dagat hinungdan nga kalit nawagtang si Rosento.
Subay sa nahitabo, gipahigayon sa sakop sa disaster team sa Toledo ang search and rescue sa maong biktima human gikataho sa mga higala niini nga kalit siyang nawala.
Nilabay ang pipila ka oras sa pagpangita ug dihang nihunas na ang dagat, nakit-an na lang si Rosento sa usa ka bahin sa baybayon nga wala na maglihok hinungdan nga dali siyang gidala sa mga recuer sa Toledo City General Hospital, apan gideklarar nga dead on arrival. / GPL / JDG
