Nabugtuon dihadiha sa kinabuhi ang usa ka hamtong nga lalaki human gipusil tumong sa iyang ulo sa wala pa mailhing mamumuno sa Purok Acacia, Dawis, Barangay San Roque, dakbayan sa Talisay, alas 6:00 sa gabii sa Sabado, Nobiyembre 4, 2023.
Sa pagpakisayod sa Supervoxpop Cebu, usa ka kasaligang tinubdan niila sa biktima nga si Alvin Tabura, ulitawo apan dunay kapuyo ug taga Sityo Kolo, Barangay Inayawan, siyudad sa Sugbo.
Nasayran nga ang kapulisan sa Talisay mosusi pa kon ang maong kaso nasulod sa ilang hurisdiksiyon human ang nahitaboan naa duol sa utlanan sa Inayawan sa siyudad sa Sugbo ug barangay nga sakop sa Talisay.
Matod pa, ang biktima naglakaw sa maong dapit ug kalit lang gihunongan sa nagmotorsiklo ug gipusil tumong sa ulo nga niresulta sa hinanaling kamatayon niini.
Ang kapulisan sa Talisay nga gipangulohan sa ilang hepe nga si Police Lt. Col. Wayne Magbanua, nagkanaon nga nagpadayon pa ang ilang imbestigasyon sa maong pagpamusil sa pag-ila sa mamumuno ug motibo sa krimen.
Gisubay usab sa kapulisan ang background sa biktima, lakip sa pagsuta sa personal o kaha bahion sa illegal nga kalihokan.
