Nakaeskapo ang subject sa warrant of arrest ug usa niya ka batabata sa dihang misukol sa mga polis nga mo-serve unta sa warrant niadtong alas 7:00 sa buntag, Sabado, Marso 29 sa Lungsod sa Argao.
Ang mga polis Argao gipangulohan ni Police Major Janus Giangan ang ni-serve sa warrant of arrest batok ni Nerio Carillo, taga Apo, Argao gumikan sa kasong illegal possession of firearms.
Inay motahan sa iyang kaugalingon si Carillo namusil hinuon ngadto sa mga sakop sa polis hinungdan nga nagsinukliay sa bala.
Nakahigayon og sibat si Carillo ug usa niya ka batabata nga si Roger Alboroto, apan nadakpan ang ilang kauban nga si Nilo Chavez Jr., 26, taga Brgy. Gutlang, Argao.
Nahipos nga ebidensiya sa mga polis ang 9mm pistol, .45 nga kalibre nga armas, mga bala, pito ka mga pakete sa gituohang shabu nga gibanabana nga mokabat ngadto sa kapin sa P88,000.
Butyag ni Giangan nga ang maong mga suspek sakop sa namatay nga si Roel Gomez, taga Lengigon, Argao nga "mastermind" sa mga nahitabong pagpamatay sa maong dapit, nalambigit sa pagpamaligya og shabu, ug paghupot og armas.
Si Gomez napatay sa mga pulis sa mga nangaging buwan sa dihang misukol sab atol sa pagtunol sa iyang warrant of arrest. / DVG
