Nag viral sa social media ang kuha sa CCTV camera nga nagpakita sa usa ka lalaki nga kalit lang nangumot og tutoy sa babaye nga iyang gikaestorya sa dalan Urgello, Brgy, Sambag 1, dakbayan sa Sugbo.
Nahitabo kini niadtong Nobiyembre 6, 2023 sa dihang usa ka lalaki nga nagpayong nga niduol og babaye ug nangutana kon duna bay nagpaabang og boarding house sa palibot.
Apan samtang gitubag sa babaye, kalit gikumot ang iyang tutoy ug dayong dagan sa lalaki pahilayo sa biktima.
Ang biktima nga daw sa nakalitan naglibog kon unsay buhaton, igo na lang sa paglakaw.
Tungod niini, ang kapulisan sa dakbayan sa Sugbo, pinaagi sa Abellana Police Station, dali nga nisusi sa insidente pinaagi sa pakig-alayon sa barangay.
Nasuta nga tinun-an diay ang biktima nga taga probinsya sa Sugbo.
Matod ni Police Lieutenant Colonel Janette Rafter, deputy city director for operations sa Cebu City Police Office (CCPO) nga sa pagkakaron ang biktima nagbakasyon pa sa abroad uban sa iyang pamilya.
Ilang gipasalig nga ilhon nila sa labing dali nga panahon kon kinsa ang mangumotay og tutoy.
“Mao na ang among gipaningkamutan karon mentras wala pa ang atoang biktima, nakig coordinate na pud siya sa kapulisan. Kami karon naningkamot mi nga masuta nato kon kinsa gyud kining suspetsado nga kalit nga naghimo atong dili maayong bulohaton sa usa ka lalaki ngadto sa babaye,” matod ni Rafter.
Gidugang ni Rafter nga niadtong 2021, duna nay insidente diha sa Urgello diin usa ka babaye’ng menor de edad ang giduol og lalaki ug gihaylo nga hatagan og kwarta basta makahikap lang sa pribadong bahin sa iyang lawas.
Apan wala kini mahinayon tungod kay nidagan ang bata.
Ang gihulagway sa bata susama sa dagway sa lalaki nga nakita sa CCTV video nga maoy hinungdan nga mo back track sila sa mga kuha sa CCTV camera sa dapit kon mao raba ang suspetsado niadtong 2021.
Mangita usab sila og kuha sa CCTV nga maklaro ang dagway niini aron maoy ilang basehan sa ilusad nga mga follow up operation ug pag-ila alang na sa pagpasaka og kaso ngadto sa korte.
