Sakop sa Philippine Coast Guard (PCG0) nga giingon nga hubog gipasanginlang naniog armas kay nasukong gitutokan, gidakop sa polis ala 1:30 sa kaadlawon sa Biyernes, Nobiyembre 10, 2023 sa Brgy. Poblacion, lungsod sa Oslob, habagatang Sugbo.
Ang suspek giila nga si Niño Jade Diaz Culanag, 29, minyo, taga Brgy. Looc, lungsod sa Oslob. Ang nireklamo mao si Mike Adong Gumapon,19, ulitawo, taga Brgy. Poblacion sa mao nga lungsod.
Si Police Captain Ian Macatangay, hepe sa Oslob Police Station nga nahinabi sa Supervoxpop Cebu, nagkanayon nga ang biktima nangayo kanila og abag human giingong gihulga siya sa suspek nga uban ang mga barkada samtang nag-snacks sa 7/11 nga tindahan.
Ang suspek nga nagmotorsiklo mopalit unta sa tindahan og ilimnong makahubog apan nasuko kini nga gitan-aw sa biktima ug mga kauban.
Giingon nga nibunot sa iyang armas si Culanag ug nanion sa biktima. Gipugngan ang suspek sa iyang kuyog dayon nanglakaw.
Daling ni-report ang biktima sa kapulisan ug sa follow-up sa alas 3:30 sa kaadlawon, nasigpatan nila ang suspek nga naglingkod sa motorsiklo daplin sa karsada sa Brgy. Looc, Oslob.
Positibong gitudlo sa biktima nga maoy nanion kaniya og armas.
In-plain view nakit-an sa polis nga nagdala og armas ang suspek, ilang giduol ug gidakop.
Nakuha gikan sa possession sa suspek ang usa kalibre.45 nga pistola nga dunay lima ka mga bala sa magazine.
“Gitutukan daw siya sa mga batan-on mao iyang gisigahan sa mata. Unya nakainom lagi, init kaayg ulo, nanion sa armas,” dugang ni Macatangay.
Sumala niya nga nakakuha sila og impormasyon nga ang suspek gireklamo sab atol sa fiesta sa ilang lugar human nagmaoy dihang nakainom.
Ang superior niini nibutyag nga problematic ang suspek human gikataho nga nagkabuwag sa iyang asawa.
Matod ni Macatangay nga nangayo og pasaylo ang suspek apan ang biktima nipadayag nga ipadayon ang kaso.
Si Culanag mag-atubang og kasong grave threat, paglapas sa Commission on Elections (Comelec) gun ban ug ilegal nga paghupot og armas kay ang iyang lisensya sa pagdala niini gawas sa balay expired na.
