Sa nagkadugay nga binayloay og pulong ug legal nga away sa panag-ilog sa karaang edipisyo sa Campania Maritima ug luna nga palibot niini tali sa Kagamhanan sa Dakbayan sa Sugbo ug Cebu Port Authority (CPA), ang katawhang magbubuhis maoy nahikawan sa kalamboan sa maong bahin sa dakbayan.
Ang duha ka mga habig dunay punto nga gibarugan. Parehong dunay plano nga pagpalambo sa dapit, apan napadaplin tungod sa nag-ung-ong nga kaso sa korte. Nganong dili maglatid ug mosagop sa usa ka win-win solution?
Ning ulahi, si Mayor Michael Rama nialegar nga ang CPA nagplano sa pagtukod og 20 ka andanang edipisyo. Apan gihimakak kini sa naulahi. Ang gisugdan nga koral giguba sa CPA tungod sa kuwestiyon bahin sa permiso sa pagtukod niini gikan sa Kagamhanan sa Dakbayan.
Uban sa pamahayag sa mayor sa miaging semana nga mopadayon sa pagsukol sa kaso sa korte. Ang CPA nakakuha og paborabling hukom sa ubos nga korte sa dakbayan. Kini ang hinungdan nga nahunong ang proyekto sa Dakbayan sa maong dapit nga kabahin sa modernisasyon sa Carbon Market.
Apan nasayod kita nga dili pa kini maoy katapusan. Pwede pa ipasaka sa Court of Appeals (CA) ang kaso ug sa pinal nga paghukom sa Korte Suprema. Tataw nga modagan pa kini og hataas nga panahon. Tataw usab nga matanggong ang kalamboan sa maong dapit.
Ning puntoha, ang duha ka mga habig mas maayong mag-abot sa tunga sa paghiusa sa ilang mga plano. Parehong naghisgot sa pagpalambo sa dapit. Labaw sa tanan, managsama nga sanga ug ahensiya sa kagamhanan. Dili unta angay nga makontra.
Apan sa pagpatigbabaw sa garbo, mao gyud kini ang mahitabo. Ang yano nga sitwasyon mahimong komplikado ug lisod sulbaron. Maayong magkasinabot na ug maghiusa sa ilang plano.