Nipahimangno si Mayor Michael Rama nga masirhan ang tulo ka dekada nang nag-operate nga mall sa dakbayan sa Sugbo kon di mohimo og lakang ang management aron kapugngan nga masubli ang dakong baha nga nasinati niadtong Septiyembre.
Apan sa kadugay na sa panahon nga naa ang mall sa mao nga dapit, kadto lang higayuna nga naingon niadto ang kadto nga bahin sa parking lot. Bisan ang management sa mall nakugang kon nganong sa pipila ka bag-ohay lang nangagi nga mga uwan, ingon niadto ang nasinati. Sulod na sa daghang katuigan, kadto nga portion sa parking area wa makabaha og ingon niadto ka grabe.
Segurado nga di ang mall ang mabasol sa mao nga hitabo kay wa man silay gipatuman nga mga kausaban nga mag-usab usab sa kahimtang sa drainage system nga makaapekto sa agas sa tubig.
Ang dunay dagkong mga kausaban mao ang palibot. Duna nay daghang mga pagpalambo sa palibot sa mall. Di kaha kini maoy nakaapekto sa agas sa tubig? Gisuta ba kaha og maayo sa Siyudad sa Sugbo ang tinubdan sa problema, nga klaro kaayo nga wa nagagikan sa Gaisano Country Mall? Kay kon sa ilaha pa kini nagsugod, niadto ra unta kini nahitabo.
Di layo ang posibilidad nga nausab ang agianan dagan sa tubig sukad sa gihimong mga pagpalambo sa palibot busa, di angay nga diretsong idat-og ngadto sa mall ang hitabo. Inay, naa may mga engineer ang Siyudad, makigtambayayong di lang sa mall management, kon di sa tanang stakeholders nga apektado usab sa baha sa mao nga dapit aron pangitaon ang tinubdan sa problema, inay diretsong ilabay ngadto sa mall.
Kay kon way grabeng baha kaniadto sa mall, wa nagsukad kanila ang problema. Gisusi ba kaha pag-ayo ang tinubdan? Di ba kaha maayo nga gahinan og igong panahon sa pag-obserbar kon diin gikan ang problema? Sama sa pag-monitor kon mag-uwan man? Di ba mas makita ang sitwasyon kay sa pagbisita lang sa dapit nga wa nay uwan? Matun-an unta og maayo ang problema.
Hayan makatabang pa usab kini sa Siyudad sa pagtuon sa hinungdan sa grabeng baha sa daghang mga dapit matag uwan. Laing dunay samang kasinatian ang Sto. Niño Village. Kadaghan na sab sila gibaha, apan di ingon niadto kalawom nga milapas na sa tawo.
Wa sa village nagagikan ang problema, kon di dako ang posibilidad nga gikan sa ibabaw. Mao sab ni ang sa mall, di gikan nila ang problema.