Moabot ngadto sa P12 milyunes nga balor sa ilegal nga drugas ang nasakmit sa Police Regional Office (PRO) 7 sulod lang sa 24 oras nga police operations sa Central Visayas.
Ang director sa Police Regional Office (PRO) 7 Police Brigadier General Anthony Aberin nagkanayon nga sa 1.7 kilos sa ilegal nga drugas nga nasakmit, sila usab nakasikop og mga high profile drug suspect.
Dako og nasakmit ang Cebu City Police Office, pinaagi sa City Drug Enforcement Unit, diin nakakuha og 405 gramos nga mobalor og P2.7 milyunes gikan sa drug suspect nga nagpuyo sa Chinese Cemetery.
Sa Tagbilaran city, Bohol, ang kapulisan nakasakmit og 355 gramos sa gituohang shabu nga dunay standard drug price nga P2.4 milyunes gikan sa usa ka negosyante ug high profile drug personality atol sa buy-bust.
Ang labing dako nga nasakmit sa CCPO mao ang sa operation sa Mambaling Police Station sa Barangay Bulacao, dakbayan sa Sugbo sa alas 3 sa Lunes sa kaadlawon, Nobiyembre 13, 2023, nga moabot og 1,022 gramos nga dunay standard drug price nga P6,949,600.
