Dili mominos P1.8 milyunes ang danyos sa sunog sa barangay hall sa Consuelo, lungsod sa San Francisco, isla sa Camotes, amihanan sa lalawigan sa Sugbo, ala 1:15 sa kaadlawon sa Miyerkules, Disyembre 13, 2023.
Ang mga estambay sa dapit mao ang unang nakamatikod sa pag-aso sa barangay hall ug daling nipahibalo sa mga opisyal sa barangay.
Sa pakighinabi sa Supervoxpop Cebu kang brgy. konsehal Lizel Yuson, siya nagkanayon nga dihang nasayod sa hitabo, nanawag dayon siya sa mga bombero sa lungsod ug kapulisan.
Apan, dason sa konsehal, ang ilang barangay dunay gilay-on nga 10 kilometros gikan sa sentro sa lungsod hinungdan nga nilanat og pipila ka minutos ang pag-abot sa mga bombero ug kapulisan.
Ang kayo nakakatap na pag-ayo sa duha ka andana’ng barangay hall sa pag-abot sa mga bombero.
Lakip sa naugdaw mao ang importanteng mgs dokumento ug mga butang sa barangay.
Matod ni Yuson, ang sunog namatikdan nga nagsugod sa outlet sa water dispenser nga naka-on sulod sa 24 oras.
Apan niadtong higayuna, wa ang ilang mga barangay tanod tungod sa pagresponde sa alarma sa usa ka kaso sa pagpangawat.
Matod niya nga gisirado ang barangay hall ug pag-abot sa ilang secretary naablihan ug naglisod na sila sa pagkuha sa fire extinguisher tungod sa kadako na sa kayo.
Dugang ni Yuson nga way naangol. Si Police Staff Sgt. Roldan Florentino, OIC sa Police Station sa San Franciso, niingon nga moabot sa P1.8 milyunes ang danyos.
