Mas gipahugtan sa Cebu Police Provincial Office (CPPO) ang ilang kampanya batok sa ilegal nga drugas, wanted persons, illegal possession of firearms, ilegal nga sugal, ug uban pang kalapasan, lakip ang estriktong pagpatuman sa mga lokal nga ordinansa sa mga lungsod ug siyudad sa lalawigan gikan Agusto 24 hangtod 30, 2026.
Nakalusad sab ang CPPO og 34 ka anti-illegal drug operations nga niresulta sa pagkasikop sa 46 ka indibidwal ug pagkasakmit sa 152.87 gramos nga gituohang shabu nga adunay standard drug price nga mokabat sa P1,039,516.
Gawas niini, 74 ka kaso ang napasaka ngadto sa korte kalabot sa kampanya batok sa ilegal nga drugas.
Sa kampanya batok sa mga wanted person, 28 ka pinangita sa balaod ang nasikop atol sa 28 ka operasyon, samtang 32 ka warrant of arrest ang napatuman sa kapulisan.
Sa 28 ka wanted person nga nadakpan, unom ang giila nga Most Wanted Persons (MWP), samtang 22 ang giila nga Other Wanted Persons (OWP).
Gipakusgan sab sa CPPO ang kampanya batok sa illegal possession of firearms pinaagi sa 25 ka operasyon nga niresulta sa pagkasikop sa 14 ka tawo ug pagkasakmit sa 15 ka armas.
Laing 10 ka armas ang boluntaryong gitugyan sa mga police station, samtang 15 ka kaso ang napasaka ngadto sa korte. / AYB
