Dili mominos sa P5,622,897.10 nga balor sa food ug non-food items (FNFIs) ang natabang sa Department of Social Welfare and Development (DSWD 7) ngadto sa apektadong mga pamilya sa dakong sunog nga niigo sa Sityo Sta. Maria, Barangay Pusok, dakbayan sa Lapu-Lapu, niadtong Disyembre 12, 2023.
Lakip sa nahatag ang 1,098 ka 10 litros nga bottled water, 1,098 ka sleeping kits, ug 2,196 ka mga malong.
Subay sa hangyo ni Congressman Sony Lagon ug Senator Mark Villar, dunay 4,622 ka family food packs (FFPs) ang gipagawas usab sa duha ka managlahing mga kalihukan.
Base sa Disaster Response Operations Monitoring and Information Center (DROMIC) Report #6 sa fire incident nga gipagawas niadtong Disyembre 17, ang apektadong mga pamilya niabot og 2,202, nga gilangkuban sa 5,151 ka mga indibidwal.
Temporaryo sila’ng gipahiluna sa duha ka natukod nga evacuation centers sa Pusok Elementary School ug Pusok Recreation Center sa maong barangay.
KOORDINASYON
Atol ning pagsuwat, ang local government unit (LGU) sa Lapu-Lapu City, isip first responder sa insidente, nihatag na og kinatibuk-ang P7.2 milyunes nga kantidad sa mga hinabang sa ilang mga konstituwente.
Nakigtagbo sila kang social welfare committee chair Councilor Annabeth Cuizon, Lapu-Lapu City Social Welfare and Development Officer Junard Abalos, ug City Disaster Risk Reduction and Management Office head Nagiel Bañacia ug nipasalig nga ang field office mohatag og augmentation.
Gipadala dayon sa DSWD 7 ang ilang gibansay nga mga kawani sa Camp Coordination and Camp Management (CCCM) ug Internally Displaced Person (IDP) Protection, ug ang LGU Lapu-Lapu nipadala sa ilang 15 ka mga kawani sa City Action Team aron matabangan ang mga kauban sa LGU sa pag-monitor ug sa operasyon sa evacuation center ug sa kahimtang sa mga bakwit, ang paghatag sa teknikal nga tabang ug pag-report sa datos sa Field Office alang sa konsolidasyon.
Niadtong Disyembre 15, si Assistant Regional Director for Operations Juanito C. Cantero, uban sa Disaster Core Group Specialist ug CCCM ug IDP Protection Expert Grace I. Yana, ningbisita sa mga evacuation camp ug nipresentar sa iyang mga nakaplagan ngadto kang Abalos.
Ang resolusyon sa mga nakaplagan nakatabang sa mga IDP ug LGU nga makabaton og mas maayong temporaryo nga kahimtang sa pagpuyo ug operasyon sa kampo, matag usa.
Ang DSWD Field Office 7 padayon pa nga nakig-alayon sa LGU Lapu-Lapu City ug nipasalig kanila nga ang ahensya nangandam sa paghatod og dugang augmentation support sa apektado’ng mga pamilya base sa assessment ug hangyo. (gikan sa PR)