Dili katuo ang kabanay niadtong 17-anyos nga dalaga nga ang pagkalumos maoy hinungdan sa iyang pagkamatay human napalgang wa nay kinabuhi sa dagat sa Barangay Balod, Lungsod sa San Fernado sa buntag sa Lunes, Agusto 31, 2026.
Si Rodel Canonego, amahan sa biktima nga si Mariel, sayo nga nimata sa maong adlaw ug nag-andam og pamahaw.
Saysay ni Canonego nga wa sila makamatikod nga nigawas diay si Mariel pasado alas 9 sa buntag kay matod pa naligo sa dagat. Paglabay sa usa ka oras, gipahibalo ang pamilya nga nalumos ang iyang anak.
Dako ang pagduda sa amahan nga gipatay ang iyang anak nga posible’ng gisumbag sa dihang nilugnot hinungdan nga nawad-an og umoy, dayon gipahimuslan ang pagkababaye.
Aron sab sa pagtago sa krimen, gilumsan ang biktima hangtod nga namatay aron nga ipatuo nga nalumos.
Sigon pa sa amahan nga adunay namatikdan nga lagom diha sa lawas sa iyang anak nga posible nga gidagmalan una sa wala pa lumsi.
Nagpadayon nga pag-follow up ang kapulisan sa maong kaso ilabi na nga pagkuha og forensic evidence aron sa pagtino sa hinungdan sa kamatayon sa maong dalaga. /